Read Yimchungru Naga M. Khün 146 Bible Online

M. Khün 146 - Yimchungru Naga bible

M. Khün 146

¹ATUNGPUH shiang! ATUNGPUH shiang, O I me!

²I arhang lachoki inü ATUNGPUH shibah; I rhangdung lachoki inü I Thrünpuh ki müshikhibo khün thsübah.

³Nünü yakzanshuhrübo yungsho arungpü mülakhi mihtsürü tsührü kheak dükin.

⁴Api me chamachihchoh, api nihbuh lo lim rholochoh; ju nimung chingnü api lümkhibo dükheakchoh.

⁵Shepü nihbuh arung Jakob Thrünpuh kheak lanü asühpü, shepü mulonglam ATUNGPUH api Thrünpuh la,

⁶shepünü thüning tüsho alomi, keto tüsho ju ching lakhi alala thrün; shepünü lünnü thiyuro zocho,

⁷shepünü junoa larü thsungkheak thiyuro rhimocho, shepünü akhümrü kilim tsühyungbe jihcho. ATUNGPUHNÜ aramrübo zuzu jihchoh.

⁸ATUNGPUHNÜ müktukrü mükbo khimshuhjihchoh; ATUNGPUHNÜ mükhüma larü bemusuchoh; ATUNGPUHNÜ thiyuro-lungkirü muzhochoh.

⁹ATUNGPUHNÜ jaksorübo kheak kheahchoh; apinü buhrü mülarü tüsho khimoberü shukheamjihchoh; tüshe apinü mihbukmuyuk limro thsümünimjihchoh.

¹⁰ATUNGPUH lünnü kiulongthsürü lah — O Zion, nü Thrünpuhnü lünbo alala ching kiulongthsübah. ATUNGPUH shiang!