Read Yimchungru Naga M. Khün 147 Bible Online

M. Khün 147 - Yimchungru Naga bible

M. Khün 147

¹ATUNGPUH shiang! Tümüde isa Thrünpuh kilim müshikhibo khün thsüpü tsülah; tümüde ha tsülah, tüsho müshikhi ju akhamlah.

²ATUNGPUHNÜ Jirusalem laloshihchoh; apinü Israel ramtsorü bemukhungchoh.

³Apinü mulong tukthsürü thsünguchoh tüsho arü mübo rümjihchoh.

⁴Apinü chiningbo khechoh; apinü arü alala mungnü jichoh.

⁵Isa Tungpuh ju ato, tüsho wu ching tolah; api anikhitkhi makebin.

⁶ATUNGPUHNÜ azhihayihrü bemusuchoh; apinü mihbukmuyukrü alo ching jipa bahchoh.

⁷ATUNGPUH kilim makshe jihde khün thsang; isa Thrünpuh kilim bingshang bede mungshikhibo khün thsang,

⁸shepünü thüningbo amobonü yihdocho, shepünü alo thsungkheak tsüng thsakhamcho, shepünü müzüngbo kheak rimbo mukhuhshihcho.

⁹Apinü mütüm shiwühbo tüsho khungde alakhi khüyak nunu kilim tsühyungbe jihchoh.

¹⁰Apinü khora sühmüh ching masühchoh; apinü mihtsürü jingbo ching masüh.

¹¹ATUNGPUHNÜ api trerü, api amüthsüm ching mulonglamrü kheak asühchoh.

¹²ATUNGPUH shiang, O Jirusalem! Nü Thrünpuh shiang, O Zion!

¹³Tümüde apinü nüsa chipiripit khrihbebo düküngshihdo; apinü nüsa bolung nüsa tsührübo müngühjihdo.

¹⁴Apinü nüsa aredungyeanbo ching mungtsü thsüchoh, tüsho wheat hi atsüdaknü nüsa reangkeamshihchoh.

¹⁵Apinü api yukhüm alomi ching yüshihchoh; api yu khide athride alihchoh.

¹⁶Apinü shihnam hing nangde phürüm jihchoh; apinü awahbo nangde thüwün hiumüzütshihchoh;

¹⁷apinü lungjinimbo nangde aru akishihchoh; api yo arüng miki shenü azhipkhukba?

¹⁸Apinü api yu yüshihchoh tüsho jurü niushihchoh; apinü api pung yünshihchoh, tüsho kebo bukchoh.

¹⁹Apinü Jakob ki api yu, api yakzan thsükhibo tüsho api mahkhapkhibo Israel ki khipkhitchoh.

²⁰Apinü ha püpü trükshih ki mürhimo; tüsho api mahkhapkhibo arünü mümükheah. ATUNGPUH shiang!