Read Yimchungru Naga M. Khün 17 Bible Online

M. Khün 17 - Yimchungru Naga bible

M. Khün 17

¹O ATUNGPUH , I thiyuro mushukhi sojang; inü azhikhi aniang. Inü tamkhüntamnükhi anijang — ha mülapmüji münküp chingnü akhiukkhi yung.

²I mahkhapkhi nü kilimnü arüshang; nü mükbonü alungki kheak kheahshang.

³Nünü I mulong rükakheah; nünü azhing ching I rhuakheah; nünü I rükakheah tüsho tümü müngü; I münnü neak müyihbeak de inü thado.

⁴Püpürü nangde inü amütsü masuk; inü nü yu anido tüsho athsümünim limro müyan.

⁵Nü limrobo ching I jingdükübo tholojang, junangde I jingdün müthsüphah.

⁶Inü nü ki jichoh, O Thrünpuh, tümüde nünü I ki alobah; I ki aniang tüsho I tamkhüntamnü sojang.

⁷Nü amüyinsahbe amuzho huhang tüsho I khümkhitang; nü kheak tsoyukkhinü I riri chingnü I khümkhita lah.

⁸Nü mükjibo nangde I kümdoang; nü ghidükeang alamme khüp I jikshang,

⁹I junorü mihbukmuyuk chingnü, I zündoa lakhi asheshihbe thiriri chingnü.

¹⁰Arü kheak mihmuzho müla tüsho kükheangde asukchoh.

¹¹Arünü I phükihbah zündolah; I alo ching nima keamshihpü arü mükji müzhingkihlah.

¹²Shih thonakpü mürheangkhi kekhüzü nangde, kekhüzü nunu ajik dangpung ching sudübüma binkhi nangde lah.

¹³Asürang, O ATUNGPUH , api shoruang, tüsho keamshang; nü nukshang hode mihbukmuyuk chingnü I bekhitang,

¹⁴O, ATUNGPUH , hadürü mihtsürü ha rhangdung ching shihcham larü, jika lakhi nü lakhitnü bukthsüshihkhi khah chingnü I khümkhitang. Arü tsührübo kheak arü reangkeamchoh, tüsho arünü arü tsührübo khilim lakhit thsakhama zochoh.

¹⁵I thsungkheak a, inü nü miro thiyuro-lungki ching ngübah; küyimki I asürübanü nü jak ngükhi hode I reangkeambah.