Read Yimchungru Naga M. Khün 18 Bible Online

M. Khün 18 - Yimchungru Naga bible

M. Khün 18

¹Inü nü muzholah, O ATUNGPUH , I sühmüh.

²ATUNGPUH ju I lungto, I chipi tüsho I bekhitrü, I Thrünpuh, I sühmüh, shepü kheak I tsoyukcho, I tsung, tüsho I akhümkhit juh, I chipi.

³Inü ashijihpü thülünkhi ATUNGPUH ki jichoh, tüsho I riri kheaknü I khümkhita lah.

⁴Ashe liubonü I hingdoa lah, athsümünim düchinü I zhidoa lah;

⁵Ashe-lomi liubonü I hingdoa lah, ashebe qimürip I ki lah.

⁶I lümthsünü ching inü ATUNGPUH jichoh; arung thsungkheak inü I Thrünpuh ki ji. Api arüngyam chingnü apinü I düsheak so; tüsho inü azhikhi api nükhünbo khiung.

⁷Judüki alomi niuk tüsho ajan; awung khimtanbo niuk tüsho ajan, tümütüsho api bukakhiuk.

⁸Anupung chingnü mokhüh, tüsho amün chingnü motru le mokhihbo yükih.

⁹Apinü thüning yakrüpbah aki; amo amitingbo ajing khüp lakheah.

¹⁰Apinü cherub kheak bin, tüsho phin; apinü apung ghidükeangbo kheaknü athride arü.

¹¹Apinü amitingnü api muhiudo, ke zahkhi amonü api müheando.

¹²Api müngüh ayinatrüm chingnü arulungbo, tüsho chinchobe phürapde amo arü.

¹³ATUNGPUHNÜ thüning ching tsüngmuk, tüsho Khide Achangbuhnü arulung, tüsho chinchobe phürapkhinü adüsheak thsü.

¹⁴Apinü api hühzobo yüshihbah thiriri hiumüzütshih; apinü chinchobe phürapa yüshih tüsho arü alihde tsoshih.

¹⁵O ATUNGPUH , nünü athürühchoki, nü nupung chingnü sheak mütchoki keto rubo ngüde kam, tüsho alomiküp khimtan aleangkheak lakheah.

¹⁶Apinü akulimnü akibah I tholo; apinü ke asükbo chingnü I thokhit.

¹⁷Apinü sühmüh larü I thraneankhi I riri kheaknü I bekhit, tümüde arübo I thsungkheak khide sühmüh lakheah.

¹⁸I thsümütsü nimung arünü I zündo, tüshe ATUNGPUH ju I tsunglorü lakheah.

¹⁹Apinü I amülih dangpung ching bede akhiuk; apinü I kheak asühkhi hode I bekhit.

²⁰I thiyuro-lungki yande ATUNGPUHNÜ I kilim thsambah jih; I khahbo müsühkhi yande apinü I müngühjih.

²¹Tümüde inü ATUNGPUH yakzanbo ani, tüsho mihbukmuyukde Thrünpuh kheaknü müchamachih.

²²Tümüde api yuzüngbo alala I miki lakheah, tüsho api yakzan thsükhibo chingnü murholo.

²³I api miki amüdopü mülade alakheah tüsho inü amülim mürhimo.

²⁴Jumonü ATUNGPUHNÜ I thiyuro-lungki yande, api miki I khahbo müsühkhi yande I kilim thsambah jih.

²⁵Thiyuro larü ki nünü thiyuro lade huhchoh; amüdopü mülakhi mihtsürü ki nünü amüdopü mülade huhchoh;

²⁶atsangkhitrü ki nünü tsangkhitde huhchoh; mihbukmuyuk ki nünü lungkhangchoh.

²⁷Tümüde azhihayih mihtsürü nünü bekhitchoh; tüshe mükji müzhingrü nünü thokheamchoh.

²⁸Tümüde nünü I tsün takkihbah; ATUNGPUH I Thrünpuhnü I mitingkhi yinshihbah.

²⁹Am, nü hode inü bonungrü zünakbah; tüsho I Thrünpuh hode inü chipi kheak jukbah.

³⁰Thrünpuh limro ju abanathsangkhi lah; ATUNGPUH yu ju mütsanmükhikhi lah; api kheak kinrü alala kilim api ju tsung ah.

³¹ATUNGPUH kheak hode Thrünpuh ju she a? Tüsho isa Thrünpuh kheak hode Lungto ju she a?

³²Thrünpuhnü sühmüh hode I züt thsüjih, tüsho I limro banthsangshih.

³³Apinü I jingbo shihmüchi jing nangde kamshih, tüsho achangbo kheak tsüde zojih.

³⁴Thirithsü thsungkheak apinü I nokihchoh, junangde I binnü müwayinchi sanglüh hünkhukchoh.

³⁵Nünü I akhümkhit tsung jih, tüsho nü khah tsülimnü I tholo, tüsho nü arung hode I ato kamshih.

³⁶Nünü I khüp limro tode kamshih; junangde I jing mujuphah.

³⁷Inü I riribo müsham tüsho arü yanphuh; arü müdükheakshihyi khiungde inü murholo.

³⁸Inü arü yurijih, junangde arübo masürükhuk; arübo I jing khüp keam.

³⁹Tümüde nünü thirithsü thsungkheak sühmühnü I züt thsüjih; I azhihde wusurü nünü I khüp juyuk.

⁴⁰Nünü I kilim I riri hungbo jih, junangde I thraneanrü inü dükheakshih.

⁴¹Arünü zhi, tüshe arü khümkhitpü she mülakheah, ATUNGPUH ki she zhi, tüshe apinü arü ki malojih.

⁴²Judüki inü apung müngüh asungthulung nangde arü zünak; kiudunglimrobo ching müneanmuru nangde inü arü jipa bah.

⁴³Nünü mihtsürübonü zündokhi chingnü I bekhit, nünü I trükshih yo aku kamshih; inü mümükheahkhi mihtsürübonü I tankihpü kam.

⁴⁴Arünü I dünkheak soakede I ki mihyuani; khiungkerübonü I ki mükhüm.

⁴⁵Arü alala mulong dükheakabah; arü chipibo chingnü arübo ajande arü.

⁴⁶ATUNGPUH lah! I tsungdobuh shiang! I akhümkhit Thrünpuh shuhkihshang.

⁴⁷Thrünpuhnü I kilim royimpü jih, tüsho mihtsürübo I bukkhüp kamshih;

⁴⁸tüsho I thiriribo kheaknü bekhit. Nünü I azhihrü kumung I shuhkih; thiyih bukpü mihtsürübo kheaknü nünü I khümkhit.

⁴⁹Jumonü inü nü trükshih bolung shijihbah, O ATUNGPUH ; inü nü mung müshikhi khün thsübah.

⁵⁰Api kiulongthsürü kilim apinü abekhitkhi ato jihchoh, tüsho api yo mujude-mokhitkhi David, tüsho anihbuh tsühsoniusobo ki lünnü amüthsüm huhchoh.