Read Yimchungru Naga M. Khün 22 Bible Online

M. Khün 22 - Yimchungru Naga bible

M. Khün 22

¹I Thrünpuh, I Thrünpuh, tümüde nünü I bahyuka la? Tümüde I rungpü, I ashearakhi chingnü limshude la?

²O I Thrünpuh, animuro inü zhichoh, tüshe nünü malojih, tüsho are zhichoh tüshe sühakhim müla.

³Tüshe nü a Israelnü ashijihkhi Amüsühbuh Khülang kiulongthsü-binkiu kheak binlah.

⁴Isa bebuhrünü nü kheak kin; arünü kin tüsho nünü arü bekhit.

⁵Arünü nü ki zhi, tüsho bekhit; arünü nü kheak kin, tüsho achih müngü.

⁶Tüshe I a mihtsürünü mükhemükimkhi tüsho luhmünekhi ari ah tüsho mihtsürü yung.

⁷I ngürü alalanü I keangrüchoh; arünü luhmüneyu thade arü ku lukchoh:

⁸“Apinü ATUNGPUH kheak kindo, apinü anihbuh khümkhitshang; apinü anihbuh bekhitshang, tümütüsho apinü anihbuh kheak asühlah!”

⁹Tüshe nünü I nuyam chingnü yihkhit; I be khüh kheak lachoki nünü I kinshih.

¹⁰I zübechokinü I nü kheak lakheah. I be nuyam chingnü nü I Thrünpuh lakheah.

¹¹I kheaknü limshude düla, tümüde küpkhuk thüninde lah; tümüde I rungrü sheshe müla,

¹²Moshipung ahihdonü I mühidoa lah; Bashan moshipung amürangbonü I mükamdoa lah.

¹³Arungde shih chakthünakkhi kekhüzübonü I azhihde arü mün kachoh.

¹⁴I a ke nangde dungkhita lah, I robo phülapa lah. I mulong ju thürip nangde niuthünaka lah;

¹⁵I sühmüh ju phühkheam nangde kunga lah, I mulo khühlüh kheah dakkihchoh; nünü I ashebe asungthulung ching bahjihdo.

¹⁶Khihnubonü I mükamdoa lah; mihbukmuyuk botonü I sündoa lah. Arünü I khahbo le I jingbo chinkhitshih.

¹⁷Inü I robo alala khekhuklah. Arünü I kheak kheahmüripde kheahchoh.

¹⁸Arünü arü bolung azan thsüde I khimmih chama luchoh.

¹⁹Tüshe O ATUNGPUH , nü I kheaknü limshude düla; O I sühmüh, I rungpü nahdang!

²⁰I rhangdung nukshang chingnü, I shoto rhangdung khihnu wu chingnü bekhitang.

²¹Kekhüzübo mün chingnü, mütüm moshipungbo juhbo chingnü I khümkhitang.

²²Inü I keoniorü ki nü mung khipkhitbah; amukhungrü bolung inü nü shijihbah.

²³Nüsa ATUNGPUH trerübo, api shiang! Nüsa Jakob tsühsoniuso alala, api müretahshang, tüsho nüsa Israel tsührübo, api treang!

²⁴Apinü zhochihrü mülümmuwuh yungsho arü thsünükhi amümürang müthsü; apinü arü kheaknü rholode mutso, tüshe arünü arung thsungkheak zhichoki alojihchoh.

²⁵Amukhungrü ato ching inü nü shijihbah; api trerü miki inü thiyuchihchimkhi jihbah.

²⁶Zhochihrünü atsühbah tüsho reangkeambah; sherünü api yimchonü ATUNGPUH shijihbah. Arü kamruhroro latsühlayung lashang!

²⁷Alomiküp thrip aban chingnü ATUNGPUH lümkhitbah tüsho api kilim rholobah; tüsho trükshih yamkhün alalanü api kingaünbah.

²⁸ATUNGPUH ju kiulongthsürü ah, tüsho apinü trükshihbo yakzan shuhchoh.

²⁹Kükheangküyang mihtsürü alalanü api miki khukningbah; ashe asürükhi mihtsürü alalanü api miki khukningbah.

³⁰Arübe lünbonü api tankihbah; mihtsürübonü arübe lün ki ATUNGPUH dünkheak thabah.

³¹Müzübeyikhi mihtsürübo ki thabah: “ATUNGPUHNÜ api mihtsürü khümkhit.”