Read Yimchungru Naga M. Khün 25 Bible Online

M. Khün 25 - Yimchungru Naga bible

M. Khün 25

¹O ATUNGPUH , nü kilim I me shuhkihchoh.

²O I Thrünpuh, nü kheak inü kinchoh, I achih düngüshih; I riribonü I dükukshih.

³Nü aleangrü sheshe achih düngüshih; nü azhihrübo achih ngüshang.

⁴I ki nü limro mükheahshang, O ATUNGPUH ; I ki nü limrobo thsangyuang.

⁵Nü thiyuro ching I beang, tüsho I ki thsangyuang, tümüde nü a I akhümkhit Thrünpuh ah; nimung aban inü nü aleanglah.

⁶O ATUNGPUH , nü amüthsüm tüsho nü muzhodakkhi lümkhitang, tümüde jurübo adüsonü lah.

⁷I athunu neakbo yungsho inü alakmihkhibo dülümkhitjih; nü muzhodakkhi tüsho nü tsükhi ching I lümkhitang, O ATUNGPUH !

⁸ATUNGPUH ju atsü tüsho alungki; jumonü apinü aneakrübo limro thsangdanchoh.

⁹Apinü azhihayih ju alungki ching bechoh, tüsho api limro thsangyuchoh.

¹⁰Api tangzüng tüsho yukhümbo anirü alala apinü thiyuro tüsho amüthsümnü bechoh.

¹¹O ATUNGPUH , nü mung chingnü I mülimkhi bahjang, tümüde ha tode lah.

¹²ATUNGPUH trekhi mihtsürü ju shepü a? Anihbuh thsungkheak mokhitkhi limro apinü thsangdanbah.

¹³Api latsühlayung ching labah tüsho anihbuh tsühsoniusobonü alomi yamrüplurüp lubah.

¹⁴ATUNGPUH aramyu ju api trerü kheak lah, tüsho apinü arü ki api tangzüng huhbah.

¹⁵I mükbo lünnü ATUNGPUH kilim lah, tümüde apinü keang chingnü I jing yihkhitbah.

¹⁶I kilim rholoang, tüsho I ki müthsümang; tümüde I a zhikrangkhündo tüsho thsünükhi lah.

¹⁷I mulong kipathsükkhi akhimshang, tüsho I lümthsünü chingnü bekhitang.

¹⁸I thsünükhi tüsho küpkhuk lümakheahjang, tüsho I neakbo alala bahjang.

¹⁹I riribo küdükhüh a tüsho arünü küdükhüh I thraneanchonü lümakheahjang.

²⁰I rhangdung aheangang, tüsho I bekhitang; I achih düngüshih, tümüde I nü kheak tsoyukchoh.

²¹Thiyuro-lungki tüsho alungkinü I kümdoshang, tümüde inü nü aleanglah.

²²O Thrünpuh, api küpkhuk alala chingnü Israel rhokhitang.