Read Yimchungru Naga M. Khün 28 Bible Online

M. Khün 28 - Yimchungru Naga bible

M. Khün 28

¹O ATUNGPUH , I tsungdorü, inü nü ki jichoh; inü ajikhi anijang, nünü I ki malojihsho Ashe-lomi ching yüzahrü bolung I labah.

²Inü arung thsungkheak nü ki zhide, nü amüsüh arüngyam lim I khah chungkihchoki, inü amushukhi düsheak sojang.

³Sherünü yamhingrü ki mungtsü asukcho, tüshe arü mulong ching amütsü larü mihbukmuyuk lung I dübahyuk.

⁴Arü mihbukmuyuk rhimo yande arü ki jihang; arü khah rhimo yande arü thsümüchiang; arünü athülünkhi arü kheak rhimoang.

⁵Tümütüsho arünü ATUNGPUH khah rhimobo lümamükheah, apinü arü lukkheambah tüsho küyimkishe arü müthsülo.

⁶ATUNGPUH shiang! tümüde inü amushukhi düsheak apinü sojihdo.

⁷ATUNGPUH ju I sühmüh tüsho I tsung; api kheak I mulongnü kinchoh tüsho I arung ngüa lah; jumonü I mulong tode asühchoh, tüsho khün thsüde inü api shibah.

⁸ATUNGPUH ju api mihtsürü sühmüh, api ju api yo mujude-mokhitkhi akhümkhit tsoyukpung ah.

⁹Nü mihtsürü khümkhitang, tüsho nü yamrüplurüp müngühjang; nü arü neakrü thsang tüsho lünnü arü kümang.