Read Yimchungru Naga M. Khün 30 Bible Online

M. Khün 30 - Yimchungru Naga bible

M. Khün 30

¹O ATUNGPUH , inü nü shijihbah, tümüde nünü I shuhkih, tüsho I riribo I kurungkheak masühachihshih.

²O ATUNGPUH , I Thrünpuh, arung thsungkheak inü nü ki zhi, tüsho nünü I thsüngu.

³O ATUNGPUH , nünü I Ashe-lomi chingnü bekhit, alokhün ching müyüzahshihde I rhangdung laloshih.

⁴ATUNGPUH shikhi khün thsang, nüsa api yo amüsührübo, tüsho api amüsüh wung lümkhitde makshe jihang.

⁵Tümüde api bukakhiukkhi anükhüh kheak lang lachoh, tüshe api tsüyihkhi rhangdung amuyung lachoh; atripkhi ju tsüngre khülang thsungkheak lapü kuklah, tüshe yapsu asühachihkhi arüchoh.

⁶I kuhi atsü ching inü tha, “I küyimkishe matrüt.”

⁷O ATUNGPUH , nü tsükhinü I awung adüküng nangde kamshih; tüshe nü miro I kheaknü ajikchoki I trede alakheah.

⁸O ATUNGPUH , inü nü ki zhi; tüsho ATUNGPUH ki inü mushude kheang;

⁹“I alokhün ching yüzahsho, I shekhi ching tümü alü la? Asungthulungnü nü shiba de? Junü nü thiyuro lakhi thaba de?

¹⁰O ATUNGPUH , anijang, tüsho I ki muzhoang! O ATUNGPUH , nü I rungrü thsang!”

¹¹Nünü I thsungkheak I tüzhokhi ju atsünpü kamshih; nünü I shungliukhim yihkhita bahjih tüsho asühpü phuyujih.

¹²Junangde I menü nü shijihbah tüsho zhikde müla. O ATUNGPUH I Thrünpuh, inü lünnü nü ki makshe jihbah.