Read Yimchungru Naga M. Khün 33 Bible Online

M. Khün 33 - Yimchungru Naga bible

M. Khün 33

¹Nüsa thiyuro-lungkirü, ATUNGPUH lung asühachihang; alungkirünü api shijihpü thülünlah.

²Bingshang bede ATUNGPUH shiang; aliu-thürü kihkhi bingkhungnü api ki khün khungang.

³Api ki khün aso thsang; kingsode kingang, tüsho asühde zhiang.

⁴Tümüde ATUNGPUH yu ju alungki ah; apinü arhimokhi alala ching thiyuro ah.

⁵Apinü thiyuro-lungki tüsho thiyuro muzholah; alomi ju ATUNGPUH muzhodakkhinü milah.

⁶ATUNGPUH yu hode thüningbo, tüsho api mün sheak hode ani, khinu tüsho chiningbo thrün.

⁷Apinü ketobo dangpung khülang bemukhung; apinü muliuke asükbo zowupung ching rihdoa zo.

⁸Alomi alalanü ATUNGPUH kingaünang! Alomiküp mihtsürü alalanü api wüntreang!

⁹Tümüde apinü asuk, tüsho ju rhimo; apinü thiyukhüm jih, tüsho ju düküngde zhip.

¹⁰ATUNGPUHNÜ trükshih lümkhi zhomashihchoh; apinü arü lümkhi thsükhibo rhimopü zhipdochoh.

¹¹Tüshe api lümkhi lünnü lachoh; api mulong ching lümkhi lün alala ching lachoh.

¹²Apinü ayamrüplurüp thsüde mokhitkhi trükshih, shepü Thrünpuh ju ATUNGPUH lanü müngühmühi.

¹³ATUNGPUHNÜ yinmi chingnü abinkhia kheahchoh; apinü mihtsürü tsührü alala ngüchoh;

¹⁴api yakzan shuhpungnü apinü alomi ching larü alala kheak abinkhia kheahchoh.

¹⁵Apinü arü lümkhi thsüchoh tüsho arünü arhimokhi lüpdükhi mükheahchoh.

¹⁶Kiulongthsürü khülang ju api bonungrü atonü mükhümkhit; thirithsürü khülang ju nihbuh sühmühnü mübekhit.

¹⁷Thirithsü khora ju akuk ngüpü mulonglam akeangkeang, tüsho ha sühmüh atonü mükhümkhitkhuk.

¹⁸Kheahang, ATUNGPUH mük ju api trerü, api muzhodakkhi ching mulonglamrü kheak lah,

¹⁹junangde apinü arü me ashekhi chingnü bekhitbah, tüsho khümzung kim ching arü rhangdung lashihbah.

²⁰Isa menü ATUNGPUH aleangchoh; api isa rungrü tüsho tsung.

²¹Api kheak isa mulong asühlah, tümütüsho isanü api amüsüh mung ching kinchoh.

²²O ATUNGPUH , nü amüthsüm isa kheak lashang, tümüde isanü nü kheak mulonglamchoh.