Read Yimchungru Naga M. Khün 39 Bible Online

M. Khün 39 - Yimchungru Naga bible

M. Khün 39

¹Inü tha, “Inü arhimopü lakhi akümkangbah tüsho I mulonü neak müyihbeakshih; mihbukmuyukrü I miki lachoki inü tümü she mütha.”

²Inü tümükhüh atsü dünkheak she thiyu müthade zhikde la! Tüshe I thsünü phünahde kam.

³Alunglim I mulong takde kam, tüsho I lümakheahde alachoki mo tak; judüki inü mükeokhide mülakhuk:

⁴“ATUNGPUH , I rhangdung akheam tüsho I nimungbo khekhi I ki huhang; I rhangdung künangde niokheamde tsochonü I ki mükheahshang.”

⁵Nünü I nimungbo müyilokhüh lang thsüjih; I kambo kip nü miki tümü müla. Mihtsürü aban rhangdung ju sheak khülang ah.

⁶Tsükjide mihtsürü aban alamme khülang nangde tsahchoh; tsükjide arü akeangkeang ching zuknukde lah; apinü lakhit wumujungchoh, tüsho shenü jurü lubanü mümükheah.

⁷Tüsho kheakü, ATUNGPUH , I tümü thsungkheak aleangba? I mulonglam nü kheak lah.

⁸I neakbo alala chingnü I khümkhitang, tüsho makharübonü I kheah-a dümüneshih.

⁹Inü thiyu mütha, inü I mün mükhimshuh, tümütüsho nünü ha rhimokheah.

¹⁰I kheaknü nü yo arüm luakhinang; nü khahnü adamkhinü I ashepü lah.

¹¹Nünü mihtsürü neak dünkheak thürühchoh tüsho thsangdanchoh; api akhamkhi ari nangde dükheakshihchoh; tsükjide mihtsürü ju kesheak ah.

¹²I tamkhüntamnü sojang, O ATUNGPUH , tüsho I tripkhi anijang; I tripchoki zhikde düla. Tümüde I a nü lung I buh pürü nangde jaksorü, tsotsahrü khülang ah.

¹³I chamachihbah mülayi müngüh I asühachih-a lupü thsüde I kheaknü kheahmuwuhang.