Read Yimchungru Naga M. Khün 40 Bible Online

M. Khün 40 - Yimchungru Naga bible

M. Khün 40

¹Inü arümde ATUNGPUH aleang; apinü I kilim anguh, tüsho inü azhikhi sojih;

²apinü I atrebe alokhün, alomukmuk chingnü bekhit, tüsho I jingdükübo thsakhamjihde lung kheak I jing duboshih.

³Apinü isa Thrünpuh shipü I mün ching khün aso khülang yukjih; ahihdonü ju ngübah atrebah tüsho ATUNGPUH kheak kinbah.

⁴Sherünü ATUNGPUH kincho, shepünü sangthsübo kilim manguhcho, yungsho arükchih thrünpuhbo kingaünpü mübechonü asühpü.

⁵Nünü isa thsungkheak ahihdo rhimojih, O ATUNGPUH isa Thrünpuh; nü nangde sheshe müla! Nünü isa thsungkheak amüyinsahbe lümkhibo ahihdo thsüjih. Inü jurü alala mükhekhuk — jurü khekhi hihdaklah!

⁶Nünü laksah-a kingaünkhi tüsho jihchungkhi mulune; nünü I nükhünbo yeahshungjih; taka kingaün tüsho neak kingaün nünü mükheang.

⁷Judüki inü tha, “ Kheahang, I arüchoh; küpqiu ching ju I dünkheak thrüta lakheah.

⁸Inü nü lümkhi ching asühchoh, O I Thrünpuh, tüsho nü yakzan I mulong ching lah.”

⁹Inü mukhungmüdan ato ching thiyuro-lungki yusheak atsü zhiyuk; inü I münküp müyihdo, O ATUNGPUH , nünü mükheahlah.

¹⁰Inü nü thiyuro-lungki I mulong ching müram; inü nü thiyuro tüsho akhümkhit khipkhit; inü mukhungmüdan ato ki nü muzho tüsho thiyuro rama muzo.

¹¹O ATUNGPUH , nü amüthsüm I kheaknü dülulo; nü muzhodakkhi tüsho thiyuronü mutuklode I kümshang.

¹²Tümüde mükhekhamkhi küpkhukbonü I mükamdoa lah; I neakbonü I zhihodo, jumonü inü mükheahkhuk; arübo I kuyübo kheaknü ahihbe ah; jumonü I mulong dükheakabahchoh.

¹³I khümkhitang, ATUNGPUH ! Kheakü I rungang!

¹⁴I rhangdung lupü yimrü alala achih ngüshang, tüsho yingyingde kamshang; I thsümünimpü künrü mungchih ngüde rholoshang.

¹⁵I ki, “Aha! Aha!” de atharü nihbuh achih ngükhi ching müyinnimshang.

¹⁶Nü yimrü alala nü lung asühachihshang tüsho asühshang; nü akhümkhit muzhorünü kamruhroro thashang, “ATUNGPUH shuhkihshang!”

¹⁷Tüshe I a zhochihrü tüsho mülamüthsürü ah; tütüshe ATUNGPUHNÜ I dünkheak lümshang. Nü I rungrü tüsho I bekhitrü;dashu, O I Thrünpuh.