Read Yimchungru Naga M. Khün 45 Bible Online

M. Khün 45 - Yimchungru Naga bible

M. Khün 45

¹I mulong ju mükkheahkih atsünü mikhiukde lah; inü athrütmukhungkhi kiulongthsüpuh ki khechoh; I mulo ju athrütpü thsakhama larü dosang nangde lah.

²Nü a mihtsürü tsührü bolung akhamkhi lah; nü münküp kheak mihmüthsüm bukkih; jumonü Thrünpuhnü lünnü nü müngühjihbah.

³Nü müretah tüsho nü wüntre-müretah, nü nukshang nü chim kheak rümkihang, O Wutobuh!

⁴Thiyuro tüsho alungki tsunglopü thsungkheak akukkhi lim beang; nü sühmühnü akuk ato ngübah!

⁵Kiulongthsüpuh riribo mulong ching nü hühzobo züpzüplah; mihtsürübo nü khüp keamchoh.

⁶O Thrünpuh, nü kiulongthsü-binkiu lünnü lün lah; thiyuro-lungki tso ju nü kiulongthsü tso lah.

⁷Nünü thiyuro-lungki muzhochoh tüsho mihbukmuyuk thraneanchoh; jumonü Thrünpuh, nü Thrünpuhnü asühpü müdangkenü nü müyamrü kurungkheak mujude-mokhit.

⁸Nü khimmihbo alala rhümthüneabe, aloe tüsho kassianü rhümthüneashih, thsotorü yambo chingnü arünü nü asühshih.

⁹Kiulongthsürübo tsührübebo nü wüntrekhi liberübo lung lah; nü khah tsülimpeang Ophir suna yukbah kiulongthsübe zhipbah.

¹⁰Aniang, O tsührübe, lümakheahang, tüsho nü nükhün muphoang; nü mihtsürü tüsho nüsa buhtsührü mihabahang;

¹¹junangde kiulongthsüpuhnü nü akhamkhi künde akambah; tümütüsho api ju nü tungpuh ah, api ki mükhümang;

¹²Tair tsührübe thsambah lubah arübah, alarü mihtsürünü nü muzho yimbah.

¹³Kiulongthsürü tsührübe ju kiulongthsürü-yam ching müretahde lah; anihbe khimmih ju suna bede keaka lah.

¹⁴Khimmih aphuaphu chingnü anihbe kiulongthsüpuh kilim bede yü; atsangkhitkhi anihbe müyamrübo alibe yande nü kilim bede arüdo.

¹⁵Arübo asühachihde tüsho asühde be; arübo kiulongthsüpuh yam ching yüzahdo.

¹⁶Nü buh pürü müthri nü tsührübo labah; nünü arübo lomi alala ching yakzan shuhrü kamshihbah.

¹⁷Inü lün alala ching nü mung lümkhitshihbah; jumonü mihtsürübonü lünnü lün nü shibah.