Read Yimchungru Naga M. Khün 49 Bible Online

M. Khün 49 - Yimchungru Naga bible

M. Khün 49

¹Ha aniang, nüsa mihtsürü alala; nükhün muphoang, nüsa lomiküp ching larü alala,

²abobe tüsho achangbe chido, alarü tüsho zhochihrü rukhühnü.

³I münnü lümlung asukbah, tüsho I mulong ching lümkhinü anikhitkhi hande arübah.

⁴Inü müchitmudu lim I nükhün anguhbah; bingshang khungde inü jurü amütsanbo thanakbah.

⁵Tümüde inü küpkhuk kim ching, I riribonü zündochoki trepü,

⁶mihtsürü sherünü arü lakhit ching kincho tüsho arü lakhit müthangmüsünkhi dünkheak kükheangcho?

⁷Mihtsürü khülangnü nihbuh küdah thsüde mürhokhitkhuk; apinü anihbuh rhangdung dün Thrünpuh kilim amo müjihkhuk,

⁸tümütüsho mihtsürü rhangdung dün jihpü ju khide chaklah, tüsho küyimkishe musuhdah,

⁹jude thsükhülaa api kiuyuk ching müyüzahde lünnü alabah.

¹⁰Tümüde lümlung larü mihtsürü shekhi apinü ngüchoh; junangde makharü tüsho lümduhrü mihtsürü dükheakchoh, tüsho arü lakhit püpürü kilim zojihchoh.

¹¹Arü lümkhi alunglim ju arü yambo lünnü alabah, tüsho arü lapungbo lün alala ching labah de lah; arünü arü lomi arü mung tamde jichoh.

¹²Mihtsürü wüntre ching lalashe aninga mülachoh; api ju adükheakbe shiwüh ruk ah.

¹³Ha nihbuh küdah thsüde mulonglamrü, tüsho arü lakhit kheak reangkeamrü kuhi ah.

¹⁴Namfimihnu nangde ashepü arü akhua lah; ashekhinü arü aheangbah; alungkirünü arü kheak yapsu yakzan shuhbah; arü pangbo ju arü lapung chingnü limshude alakhi kiuyuk ching shuh-a bahbah.

¹⁵Tüshe Thrünpuhnü ashepü wu chingnü I khümkhitbah, tümüde apinü I leangkhibah.

¹⁶Mihtsürü khürü alarü kamchoki, api lakhit rünkihchoki dümüyinsah;

¹⁷tümüde api shechoki tümü she hanbah mutso; api müretahkhi anihbuh dunglim müyüzah.

¹⁸Mihtsürü khülang anihbuh rhangdung lakhi kheak reangkeamkeam she, tüsho api kukzamkhi hode mungshi lalashe,

¹⁹küyimkishe ayin müngüpü lakhi ashekhi ching api jipürü lung yübah.

²⁰Mihtsürü khülang atoashang thsümonü ashepü chingnü mükhümkhitkhuk; api she shiwühbo ruk lang ashebah.