Read Yimchungru Naga M. Khün 5 Bible Online

M. Khün 5 - Yimchungru Naga bible

M. Khün 5

¹I yubo aniang, O ATUNGPUH ; I ashearakhi sojang.

²Inü azhikhi düsheak sojang, I kiulongthsüpuh tüsho I Thrünpuh, tümüde inü nü ki tamkhüntamnüchoh.

³O ATUNGPUH , yapsu nünü I düsheak sochoh; ani akhiukchoki inü tamkhüntamnüchoh tüsho nünü alojihpü aleangchoh.

⁴Tümüde nü a mihbukmuyuk ching masühkhi Thrünpuh ah; amütsü-rhimo nü kheak müla.

⁵Akükheangrü nü miki müzhip; amütsü-rhimorü alala nünü thraneanchoh.

⁶Akeangyu tharü nünü thsümünimchoh; thiyih bukrü tüsho mülapyukrü mihtsürü ATUNGPUHNÜ thraneanchoh.

⁷Tüshe nü muzho ato hode I nü yam ching yüzahbah; nü wüntrekhi chingnü inü nü amüsüh arüngyam ching kingaünbah.

⁸O ATUNGPUH , I riribo thsungkheaknü nü thiyuro-lungki ching I beang; nü limro I miki langakindo kamshang.

⁹Tümüde arü mün ching thiyuro müla; arü mulong athsümünimnü milah; arü thrukeang ju khimshuh-a lakhi kiuyuk ah; arü mulonü mülapmüjichoh.

¹⁰Arü mülimkhi thakhitjang, O ATUNGPUH ; arü rük thsükhinü arü keamshang; arünü alakmihkhi ahihdo dünkheak arü yankhitang, tümüde arünü nü azhihdo.

¹¹Tüshe nü kheak tsoyukrü alala asühachihshang, asühachihkhi thsungkheak arünü kamruhroro khün thsüshang; tüsho nünü arü tsungdojang, junangde nü mung muzhorü nü lung asühachihbah.

¹²Tümüde nünü thiyuro-lungki müngühjihchoh, O ATUNGPUH ; tsung khülang nangde nünü lümrhihde api kümdochoh.