Read Yimchungru Naga M. Khün 50 Bible Online

M. Khün 50 - Yimchungru Naga bible

M. Khün 50

¹Wuto ATUNGPUH , Thrünpuhnü asukchoh; apinü alomi athrünkhi aniakhiuklimnü aniyüzahlim khiungde jichoh.

²Thülünde akhamkhi Zion chingnü, Thrünpuhnü tah-a arüshihchoh.

³Isa Thrünpuh arüchoh, apinü zhikde müla, api müngüh amuliube mo lah, api mükamde chinthrüm ato lah.

⁴Apinü api mihtsürü mahkhappü thsüde akulim yinmibo tüsho alomi jichoh:

⁵Laksah-a kingaünkhi jihde I kilim tangzüng thsürü athülünkhi I mihtsürübo I ki mukhungang.

⁶Yinmibonü api thiyuro-lungki khipkhitchoh, tümüde Thrünpuh ju mahkhaprü ah.

⁷Aniang, O I mihtsürü, tüsho inü asukanü, O Israel, inü nü azhihde thiyumütsan jihanü. I Thrünpuh, nü Thrünpuh ah.

⁸Inü nünü laksah-a kingaünkhi yungsho mutukzhakde I miki taka kingaünkhi dünkheak nü müthürüh.

⁹Inü nü yam chingnü moshipung, yungsho mihnu boto chingnü mihnubo yihnüpü müla.

¹⁰Tümüde mütüm shiwüh aban, chithürü wungbo kheak lakhi moshi I yo ah.

¹¹Mütüm wuhnubo tüsho mükeak ching rhangdung lakhi alala I yo ah de inü mükheahlah.

¹²I khümde lakhülaa, inü nü ki mütha; tümüde alomiküp tüsho ju ching lakhi alala I yo ah.

¹³Inü moshipungbo shih tsühcho de, yungsho mihnubo thiyih yungcho de?

¹⁴Makshe jihde shuhmülanga kingaünkhi ATUNGPUH kilim jihang, tüsho Khide Achangbuh kilim nünü thiyuchihchimkhi jihang;

¹⁵tüsho küpkhuk nimung I jiang; inü nü bekhitbah, tüsho nünü I müretahbah.

¹⁶Tüshe mihbukmuyuk ki Thrünpuhnü thachoh, I yakzan khepü yungsho I tangzüng thapü nü tümü alim la?

¹⁷Tümüde nünü adanyukkhi thraneanchoh, tüsho I yubo nü dunglim bahchoh.

¹⁸Nünü ahührü ngüchoki api ki müyamrü thsüchoh; tüsho nünü müzammüramrü lung atruachihchoh.

¹⁹Nünü kamruhroro amütsü asukpü thsakhamlah; nünü küyimkishe akeangyu thapü mudukiuhlo.

²⁰Nünü binchoh tüsho nü keoniorü azhihde asukchoh; nünü nü be tsührü thsüpkhilukhichoh.

²¹Nünü harü rhimodo, tüsho inü zhikde la; I ju nü ruk ah de nünü lüm; tüshe inü nü thürühbah, tüsho jurübo nü miki akhin akhinnü azobah.

²²Kheakü ha lümakheahang, nüsa Thrünpuh mihrü, jude yungsho inü nüsa adütre kamde ayihthünakbah, tüsho nüsa bekhitrü she mülade alabah:

²³shepünü makshe-jihkhi kingaün shuhmülanga hande arüchonü I wüntrechoh; alungki limro ching yürü ki inü Thrünpuh akhümkhit huhbah.