Read Yimchungru Naga M. Khün 56 Bible Online

M. Khün 56 - Yimchungru Naga bible

M. Khün 56

¹I ki muzhoang, O Thrünpuh, tümüde mihtsürünü I kheak jungchoh; nimung amuyung apinü I junochoh;

²nimung amuyung I riribonü I kheak jungchoh, tümüde ahihdonü I azhihde kükheangde thirithsüchoh.

³Küyimki I trebanü inü nü kheak kinchoh.

⁴Inü Thrünpuh kheak kinchoh tüsho I mütre; apinü alokhikhi dünkheak inü api shichoh. Mihtsürünü I ki tümü thsükhukpü?

⁵Arünü nimung amuyung I yuripü yimchoh; arü lümkhi alala ju amütsü thsungkheak I azhihkhi lah.

⁶Arünü rukhüh mukhungchoh, arünü I rhangdung thsungkheak jika binchoki I jingdükü kheahchoh.

⁷Arü amütsü dünkheak thsümüchiang; nü bukakhiukkhi ching mihtsürübo thokheamang, O Thrünpuh!

⁸Nünü I küpkhuk mükheahlah; I chikebo nü keluh ching yukchoh; jurübo nü hüm ching müla de?

⁹Inü nü ki zhichoki, I riribo rholode atsobah; ha inü mükheahlah, tümütüsho Thrünpuh ju I thsungkheak —

¹⁰apinü alokhikhi dünkheak inü ashijihkhi ATUNGPUH lah.

¹¹Inü api kheak kinchoh, tüsho mütrede alabah. Mihtsürünü I ki tümü thsükhukpü?

¹²O Thrünpuh, nü ki thiyuchihchimkhi khüp I lah; makshe-jihkhi kingaün inü nü kilim jihbah.

¹³Tümüde nünü I me ashekhi chingnü, tüsho I jing alungkhi chingnü bekhit, junangde rhangdung ayinatrüm ching inü Thrünpuh miki tsahbah.