Read Yimchungru Naga M. Khün 57 Bible Online

M. Khün 57 - Yimchungru Naga bible

M. Khün 57

¹I ki müthsümang, O Thrünpuh, I ki müthsümang! tümüde I menü nü kheak kinchoh; tüsho harü thsümütsü muhoyikia nü ghidükeang alamme küp I tsoyukbah.

²I thsungkheaknü lüpdükhi rhimobuh, Khide Achang Thrünpuh ki inü azhibah.

³Apinü yinmi chingnü alojihbah tüsho I khümkhitbah; apinü I jungrü achih ngüshihbah. Thrünpuhnü api amüthsüm tüsho thiyuro arüshihbah.

⁴I a mihtsürü tsühbe kekhüzübo nangde alakhi thiriribonü sündobah lah; arü hübo thsüh tüsho hühzobo ah tüsho arü mulo ju azüpzüp nukshang ah.

⁵O Thrünpuh, yinmibo kumung shuhkihang; nü müretahkhi alomi alala kumung lashang.

⁶Arünü I jingdükü thsungkheak keang thsüa lah; I me mükhümdo; arünü I müngüh shingkung kiudo; tüshe ju ching arü keamyuka lah.

⁷I mulong düküngde lah, O Thrünpuh, I mulong düküngde lah; inü khün thsübah tüsho mungshi jihbah.

⁸Asürang I me! Asürang I bingshang tüsho bingkhung! Inü ani asürüshihbah.

⁹O ATUNGPUH , inü mihtsürü bolung nü ki makshe jihbah; inü trükshih bolung mungshikhünbo thsübah.

¹⁰Nü muzhodakkhinü yinmibo khiunglah, nü thiyuro lakhinü thüning qiulah.

¹¹O Thrünpuh, yinmibo kumung shuhkihang. Nü müretahkhi alomi alala kurungkheak lashang.