Read Yimchungru Naga M. Khün 66 Bible Online

M. Khün 66 - Yimchungru Naga bible

M. Khün 66

¹Alomi alalanü asühachihde ATUNGPUH ki zhiang;

²api mung müretahkhi khün thsang; api ki müretah mungshi jihang!

³Thrünpuh ki thaang, “Nü rhimobo küdükhüh atrebe la! Nü wu tokhi hode nü riribonü nü ki mükhümbah.

⁴Alomi alalanü nü kingaünbah tüsho nü müshi khünbo thsübah; arünü nü mung shikhi khün thsübah.”

⁵Arang tüsho Thrünpuh rhimobo kheahang; apinü mihtsürü tsührübo kilim rhimokhi atrebe lah.

⁶Apinü keto ju akung lo kamshih; arünü jingnü ayung hode yü. Isanü ju ching api lung asühachih.

⁷Apinü api wu hode lünnü yakzan shuhchoh; api müknü trükshihbo kheahyukchoh; azhihrübo arü küdah thsüde düshuhkihshih.

⁸Isa Thrünpuh shiang, O mihtsürübo, tüsho api shikhi düsheak soshang,

⁹apinü isa rhangdung lashih tüsho isa mangakshih.

¹⁰O Thrünpuh, nünü isa rükakheahdo; nünü isa shotoyinchi nangde tsangkhit.

¹¹Nünü isa keang ching beyuk; nünü isa düthsün kheak hahmülang yihkihjih.

¹²Nünü isa riribonü isa kubo kheak jungshih; isanü mo tüsho ke hode yü, tüshe kheakü nünü isa suhdahkhi dangpung ching bedarü.

¹³Inü nü yam ching taka kingaünkhi lude arübah; inü thiyuchihchimkhi nü kilim jihbah.

¹⁴I küpkhuk ching lachoki tümü thakheanü inü nü kilim jihbah.

¹⁵Inü namfimihnu kingaün sadam kheak takpü jihbah; inü moshipungbo tüsho mihnubo jihbah, tüsho mokhüh thüning lim yükihbah.

¹⁶Nüsa Thrünpuh trerü alala, arang tüsho aniang, tüsho apinü I me thsungkheak tümü rhimoa lanü inü athabah.

¹⁷I münnü inü api ki zhi, tüsho I mulonü api shijih.

¹⁸Inü I mulong ching alakmihkhibo zokhülaa, ATUNGPUHNÜ I ki manijih-a labah.

¹⁹Tüshe dükde Thrünpuhnü I sojihdo; apinü I tamkhüntamnü düsheak anijihdo.

²⁰Thrünpuh shiang, tümütüsho apinü I tamkhüntamnü mübahyuk, yungsho I kheaknü anihbuh amüthsüm muluakhin!