Read Yimchungru Naga M. Khün 69 Bible Online

M. Khün 69 - Yimchungru Naga bible

M. Khün 69

¹I khümkhitang, O Thrünpuh! Tümüde kebo I hung khiungde akihdo.

²Adubiopung mülakhi akhimniuhniuh asük ching I yüzahchoh; I ke asük ching arü tüsho kekingnü I zhido.

³I atripkhinü khia lah; I wak kunga lah. I Thrünpuh aleangkhinü I mük tsünshelakdo lah.

⁴Amütsan mülade I thraneanrü I kuyü kheaknü ahihbe ah; amudopü mülade I thsümünimpü yimrü I riribo ahihdo lah. Inü mahühkhi shakpü I kheak thsungkihchoh.

⁵O Thrünpuh nünü I makhakhi mükheahlah; tüsho I neakbo nü kheaknü rama müla.

⁶Nü kheak mulonglamrü I hode achih düngüshih, O ATUNGPUH , Wuto Thrünpuh; nü yimrü I hode düyingyingshih, O Israel Thrünpuh.

⁷Tümüde nü dünkheaknü inü mükhemükim hando, ju achihnü I miro lüpdolah.

⁸I a I keoniorü ki jaksorü, I be tsührübo ki khiungkerü khülang kamdo.

⁹Nü arüngyam mürheangkhinü I aniuabahdo, tüsho nü mükhemükimrünü mükhemükimkhi I kheak akihdo.

¹⁰Küyimki inü atripba tüsho khümkeak thsübanü, mükhemükimkhi inü arümpü kamchoh;

¹¹küyimki inü shungliukhim phuyubanü mihtsürübonü I luhmünechoh.

¹²Chipiripit ki binrübonü I azhihde asukchoh, tüsho amüshangrübonü I dünkheak khün thsüchoh.

¹³Tüshe I a, nünü amulongkhi kim ching I tamkhüntamnü nü kilim lah, O ATUNGPUH ; O Thrünpuh, nü amüthsüm todakkhi ching, nü thiyuro akhümkhit ching I ki anijang.

¹⁴Akhimniuhniuh chingnü I bekhitang, tüsho I dükeamyukshih; I thraneanrü tüsho ke asükbo chingnü I bekhitang.

¹⁵Kekingnü I düzhidoshih, yungsho asüknü I dümuyushih; tüsho alokhünnü I kumung amün dükhimdoshih.

¹⁶I ki anijang, O ATUNGPUH , tümüde nü muzhodakkhi ju tsülah; nü amüthsüm todakkhi yande I kilim rholoang.

¹⁷Tüsho nü yamlarü kheaknü nü miro düjik, tümüde I küpkhuk ching lah; niokheamde I ki anijang.

¹⁸I me thüninde arang tüsho ju rhokhitang; I riribo kheaknü I bekhitang.

¹⁹Nünü I mükhemükim, I achih, tüsho I wüntre müjihkhi mükheahlah; I azhihrübo alala nü miki lah.

²⁰Mükhemükimnü I mulong thsümünimdo, junangde I mulong dükheakkhi ching lah. Amuzho tüsho mulong shukheamrü inü kheah tüshe inü she müngü.

²¹Arünü I tsühyungbe müzüm, tüsho ayungpü asanke jih.

²²Arü miki dükhüm ju qimürip kamshang; arü amüsüh aniojikhibo azheang kamshang.

²³Arünü müngüpü thsüde arü mükbo tukshang; tüsho arü chim mutuklode keahkhishang.

²⁴Arü kheak nü bukakhiukkhi dungkihang; nü mulong zhipzhipnü arü tholoang.

²⁵Arü lapungbo bahkhitshang; arü khimyambo ching sheshe dülashih.

²⁶Tümüde arünü nünü ashikbuh thsümüchichoh, tüsho nünü yuria thsünüshihbuh dünkheak thachoh.

²⁷Arü neakbo alala mütsanmüküh-a zoang; nü akhümkhit ching arü shihcham dülashih.

²⁸Arübo rhangdung hüm chingnü nankhita bahshang tüsho thiyuro-lungkirü lung düthrütshih.

²⁹Tüshe I zhochihlah tüsho mulong rozhaklah; O Thrünpuh, nü akhümkhitnü I achang kheak lashang.

³⁰Inü khün thsüde Thrünpuh mung shibah, tüsho makshe jihde api müretahbah.

³¹Hanü ajuhbo tüsho abiuobo kihkhi moshi yungsho moshipung kheaknü atsübe thsüde ATUNGPUH asühshihbah.

³²Junoa larünü ha ngübah tüsho asühbah; nüsa sherü Thrünpuh yimchonü nüsa mulong thsüphuloang.

³³Tümüde ATUNGPUHNÜ zhochihrü ki anijihchoh, tüsho api yo aramrübo mümih.

³⁴Yinmi tüsho alomi, ketobo tüsho ju ching abüde alakhi lüpdükhinü api shiang.

³⁵Tümüde Thrünpuhnü Zion khümkhitbah tüsho Juda kiutobo thsübah, junangde ju ching mihtsürübo labah tüsho müküh-a lubah;

³⁶api yamlarübo tsühsoniusobonü ju yamrüplurüp lubah, tüsho sherünü api mung muzhochonü ju ching labah.