Read Yimchungru Naga M. Khün 71 Bible Online

M. Khün 71 - Yimchungru Naga bible

M. Khün 71

¹O Thrünpuh, nü kheak inü tsoyukchoh; I küyimkishe achih düngüshih.

²Nü thiyuro-lungki ching I bekhitang, tüsho I tsokhitshang; I kilim nü nükhün muphoang tüsho I khümkhitang.

³Nü I tsoyukpung lungto khülang, I khümkhitpü chipi khülang thsang, tümüde nü I lungto tüsho I chipi.

⁴O I Thrünpuh, mihbukmuyuk khah chingnü, thiyuro-lungki mülarü tüsho bukmüke mihtsürü khah chingnü I bekhitang.

⁵Tümüde nü I mulonglam ah, O Atungpuh T HRÜNPU H ; I athunuchokinü nü a inü akinkhi lah.

⁶I zübechokinü inü nü kheak angükih; nünü I be nuyam chingnü I yihkhit. Inü nü shikhi mutukzhakde alabah.

⁷I a ahihdo ki amütsan khülang kam, tüshe nü I tsoyukpung amüküp ah.

⁸Nimung amuyung nü shikhi tüsho nü müretahnü I mün mishang.

⁹I ashinkhi kim ching I yana dübah; I sühmüh mülade akamchoki I dübahyuk.

¹⁰Tümüde I riribonü I azhihde asukchoh; tüsho I rhangdung lupü jimde abinrü rukhühnü rük thsüchoh,

¹¹tüsho thachoh, “Thrünpuhnü api bahyukdo; müshamang tüsho api luang, tümüde api bekhitrü she müla.”

¹²O Thrünpuh, I kheaknü limshude düla; O I Thrünpuh, I rungpü niokheamang!

¹³I mulomülaprü achih ngüshang tüsho dükheakshang; I yuripü yimrü achih tüsho mungchih ngüshang.

¹⁴Tüshe inü mutuklode mulonglambah, tüsho alü thsüde inü nü shijihbah.

¹⁵I münnü nü thiyuro-lungki tüsho nü akhümkhit nimung amuyung thabah, tümüde inü arü akhü thsükhi mümükheah.

¹⁶Inü Atungpuh T HRÜNPU H sühmüh ching yübah; inü nü yo thiyuro-lungki lang athabah.

¹⁷O Thrünpuh, nünü I athunuchokinü thsangyu; tüsho ha nimung inü nü amüyinsahbe rhimobo khipkhitchoh.

¹⁸Kheaküshe I küyimki ashinbuhrü tüsho kubuyukba, inü ha arüpü lakhi lün mihbüm aban ki nü wu tüsho sühmüh müthayikia, O Thrünpuh, I dübahyuk.

¹⁹O Thrünpuh, nü thiyuro-lungki khide changlah, nünü rhimo atobo thsü; O Thrünpuh, nü nangde she la?

²⁰Nü, shepünü I ki küpkhukbo ato tüsho achimudo huhkheanü I sühmüh laloshihbah, tüsho alo asükbo chingnü I belode atubah.

²¹Nünü I tokhi rünkihshihbah, tüsho I mulong shukheamlobah.

²²Nü thiyuro lakhi thsungkheak bingshang bede nü shijihbah, O I Thrünpuh; inü bingkhung bede nü shijihbah, O Israel Amüsühbuh Khülang.

²³Inü nü ki khün thsüchoki, I münküpbo tüsho nünü arhokhitkhi I menü tode asühachihbah.

²⁴I mulonü nimung amuyung nü thiyuro-lungki dünkheak thabah; tümüde I yuripü yimrü yingyinga lah, arü achih ngüdo.