Read Yimchungru Naga M. Khün 72 Bible Online

M. Khün 72 - Yimchungru Naga bible

M. Khün 72

¹O Thrünpuh, kiulongthsüpuh kilim nü mahkhapbo, tüsho kiulongthsüpuh tsührü kilim nü thiyuro-lungki jihang.

²Apinü nü mihtsürü thiyuro-lungkirü, tüsho zhochihrübo ki alungkinü mahkhapbah.

³Müzüngbonü mihtsürübo kilim mungtsü, tüsho awung aninibonü thiyuro-lungki hande arübah.

⁴Apinü zhochihrü mihtsürü kilim thiyuro hande arübah; apinü müthsümülarü khümkhitbah tüsho junorü zünakbah.

⁵Arünü lünbo alala ching ani tüsho khinu lakhi khiungde nü trebah,

⁶api ju arhipkhi rimkiu kheak akikhi tsüng, alo pangkhi tsüngshimshim nangde alabah.

⁷Api nimungbo ching thiyuro-lungkirü lalim tsüde alabah, tüsho khinu mülayi khiungde mungtsü suhdahde alabah.

⁸Apinü keto chingnü keto khiungde, tüsho Ayung chingnü alomi akheam khiungde yakzan shuhbah.

⁹Sherü sunglo ching lachonü api miki mükhümbah, tüsho api riribonü asungthulung müleakbah.

¹⁰Tarshish tüsho kekung-lo kiulongthsürübonü thsambahbo hande arübah; Sheba tüsho Seba kiulongthsürübonü thsambahbo jihbah.

¹¹Kiulongthsürü alalanü api miki mükhümbah; trükshih alalanü api tankihbah.

¹²Tümüde apinü müthsümülarünü azhichoki, zhochihrü tüsho arungrü mülarü bekhitbah.

¹³Apinü zhochihrü tüsho müthsümülarü aninga lashihbah, tüsho müthsümülarü mebo khümkhitbah.

¹⁴Apinü junokhi tüsho athsümünim chingnü arü rhangdung rhokhitbah; tüsho arü thiyih ju api miki shoto labah.

¹⁵Tüsho api alabah; Sheba suna api kilim jihbah; api kilim tamkhüntamnü she mutukzhakde athsübah, tüsho nimung aban api shijihbah.

¹⁶Lomi ching, müzüngbo mujuk kheak hi muzhomopungde alabah; Lebanon nangde zhinshakde asobah; tüsho alo rim nangde kiuto mikhiukde alabah.

¹⁷Api mung lünnü alabah; ani la khiungde api mung mutuklode alabah. Tüsho mihtsürübo api lung müngühmühibah; trükshih alalanü api ki müngühmühi de ajibah.

¹⁸Amüyinsahbe rhimobuh, Israel Thrünpuh, ATUNGPUH shiang!

¹⁹Api müretahkhi mung lünnü shiang, tüsho alomi athrünkhi api müretahnü mishang. Amen tüsho Amen.

²⁰Jesse tsührü David tamkhüntamnü akheam thsü.