Read Yimchungru Naga M. Khün 73 Bible Online

M. Khün 73 - Yimchungru Naga bible

M. Khün 73

¹Tsükjide Thrünpuh a Israel, mulong müsührü ki tsülah.

²Tüshe I a, I jing mükhemüchihdo; I jingdükü lihmüchihdo.

³Tümütüsho inü mihbukmuyukrü tsüde alakhi ngübah, akükheangrü mükthsüde alakheah.

⁴Tümüde arübo thsünükhi müla; tüshe arü sühmüh dükünglah.

⁵Arü a püpürü mihtsürübo nangde küpkhuk ching müla, yungsho püpürü mihtsürü nangde müshik.

⁶Jumonü lülüshishi ju arü lak thsülah; khimmih nangde athsümünimnü arü hingdolah.

⁷Arü mükbo shihkihkhinü bümchoh, arü mulongbo amütsünü zhikhiuklah.

⁸Arünü mührü kheah-a münejihde amütsü thachoh; arünü kükheangchoh tüsho püpürü junopü lümchoh.

⁹Arünü yinmibo azhihde arü mün mujuhchoh, tüsho arü mulo alomi hode tsahchoh.

¹⁰Junangde Thrünpuh mihtsürübonü she arü kilim anguhchoh tüsho arünü athakhi mulongde kinchoh.

¹¹Tüsho arünü thachoh, “ Küde thsah Thrünpuhnü mükheahcho? tüsho Khide Achangbuh kheak mükheahmudu la shi?”

¹²Kheahang, harü ha mihbukmuyuk ah; kamruhroro zuzu thsüde lah, arü lakhitbo rünkihchoh.

¹³Akeangkeang ching inü I mulong müsühde zodo tüsho neak müyihbeakde lado.

¹⁴Tümüde nimung amuyung I shikdo, tüsho yapsu aban thsümüchido.

¹⁵Inü, “Inü ha asukbah,” de thakhülaa, inü nü mihtsürübo lün ki thiyuro mülaa labah.

¹⁶Küyimki inü ha anikhitpü lümakheahkheanü, I thsungkheaknü ha khide dukmüsüp lakheah —

¹⁷Thrünpuh arüngakopung ching I yüzahkhi khiungde; judüki mihbukmuyuk kheak tümü dünjibanü inü mükheah.

¹⁸Tsükjide nünü arübo ashahshahpung ching zojih; nünü arübo athsümünim ching bahjih.

¹⁹O, küdükhüh she anükhüh kheaknü arü thsümünima la, arübo atrebe thsüde shahde muyua lah!

²⁰Khürü asürüchoki milim khülang nangde, jumonü ATUNGPUH , küyimki nü asürübanü arübo kheamabahbah.

²¹Hanangde I mulong tukthsüde alakheah, tüsho I lümkhi khühde alakheah.

²²I khide makhaa tüsho tümü yak mümükheahde alakheah; I nü miki shiwüh khülang ruk lakheah.

²³Judüalalashe I nü lung mutuklode lah; nü khah tsülimnü I tholoang.

²⁴Nü lümthiyannü I bebah, tüsho ju dunglim müretahkhi lim I leangkhia lubah.

²⁵Yinmi ching I she la tüshe nü ah, tüsho nü hode inü amürheangkhi alomi kheak she müla.

²⁶I shih tüsho I mulong shekhipü kuklah; tüshe Thrünpuh ju I mulong sühmüh tüsho lünnü I shihcham.

²⁷Atsütsü, sherü nü kheaknü limshude lanü adükheakbah; sherü müzammüram thsungkheaknü nü bahkhidünü nünü alala dükheakshihdo.

²⁸Tüshe I thsungkheak a Thrünpuh thüninde ayüpü tsülah; inü Atungpuh T HRÜNPU H kheak kinlah, junangde inü nü rhimo alala khipkhitbah.