Read Yimchungru Naga M. Khün 77 Bible Online

M. Khün 77 - Yimchungru Naga bible

M. Khün 77

¹Inü I düsheaknü Thrünpuh ki zhi; tüsho apinü I ki sojih.

²I küpkhuk nimung inü ATUNGPUH yim; azhing ching müdüchingde I khah chungkih; I menü mulong shukheampü thsunglo.

³Inü Thrünpuh lümkhit, tüsho küpkhukde alakheah; inü atsanglo, tüsho I me shekhia lakheah.

⁴Apinü I mük mütukshih; I khide küpkhukkhinü masukkhuk.

⁵Inü awün nimungbo, jipü kimbo kam lümakheahdo.

⁶Inü azhing ching I khün lümkhit; inü I mulong ching lümakheah; tüsho I menü düshihde yim.

⁷ATUNGPUH nü lünnü abahyukba de? Apinü küyimkishe amuzho muhuhloba de?

⁸Api amüthsüm lünnü kheamdü de? Apinü alokhikhi lünnü müla de?

⁹Thrünpuhnü muzhomüyipü mihdü de? Api bukakhiukkhi ching api amüthsüm rihdü de?

¹⁰Tüsho inü tha, “Ha I thsünü ah; tüshe inü Khide Achang khah tsülim kambo lümkhitbah.”

¹¹Inü ATUNGPUH rhimobo lümkhitbah; tsükjide inü adüso nü yo amüyinsahbebo lümkhitbah.

¹²Inü nü rhimo alala lümakheahbah, tüsho nünü arhimokhibo thabah.

¹³O Thrünpuh, nü limro amüsüh lah; isa Thrünpuh nangde she thrünpuh khide tola?

¹⁴Nü a amüyinsahbebo rhimorü Thrünpuh ah; nünü mihtsürü bolung nü sühmüh khipkhit.

¹⁵Nünü nü binnü nü mihtsürü, Jakob tüsho Josep tsührübo rhokhit.

¹⁶Kebonü nü ngü, O Thrünpuh; kebonü nü ngü, arünü tre; asükbo she niuk.

¹⁷Amobonü tsüng akishih; thüningbonü düsheakbo yüshih; hühzobo she phürap.

¹⁸Nü tsüngmukkhi düsheak chitmühean ching lakheah; chinchobebonü alomiküp tahkhi; alomi ajan tüsho niuk.

¹⁹Nü limro keto ching, nü jing-tsahpung ke atobo ching lakheah, tüsho nü jingdükübo mümükheahde alakheah.

²⁰Nünü nü mihtsürübo namfimihnu boto nangde Mosa tüsho Aron khah hode be.