Read Yimchungru Naga M. Khün 79 Bible Online

M. Khün 79 - Yimchungru Naga bible

M. Khün 79

¹O Thrünpuh, trükshihbo nü yamrüplurüp ching azahdo; arünü nü amüsüh arüngyam thsümünimdo; arünü Jirusalem thsümünima mujungshihlah.

²Arünü nü yamlarübo ashemibo thüning wuhnubo jim thsüpü jih, nü yo amüsührübo shih alomi shiwühbo kilim jih.

³Arünü arü thiyih ke nangde Jirusalem alala mükamde bukshih, tüsho arü kiuyuka bahpü she mülakheah.

⁴Isa mühi trükshihbonü isa mükhemükimchoh; arünü isa ki münejihchoh tüsho keangrümünechoh.

⁵ATUNGPUH , külokhüh? Lünnü nü bukakhiukba de? Nü mükthsükhi mo nangde atakba de?

⁶Nü mümükheahkhi trükshihbo kheak, tüsho nü mung müjikhi kiulongthsübo kheak nü bukakhiukkhi dungkihang.

⁷Tümüde arünü Jakob muyudo, tüsho api lapung thsümünimjih.

⁸O, isa azhihde adüso neakbo dülümkhitjih; nü amüthsüm isa shorupü chithsade arüshang, tümüde isa khide abobe kamshihdo.

⁹O isa akhümkhit Thrünpuh, nü mung müretah thsungkheak isa rungang; nü mung chingnü isa bekhitang tüsho isa neakbo dünthsükhijang!

¹⁰“Arü Thrünpuh küching la” de tümü thsüpü trükshihbonü athashihpü? Nü yamlarübo thiyih bukkhi royimkhi isa mikinü trükshih bolung mükheahshang.

¹¹Ramyukrü ashearakhi nü miki arüshang; nü wu tokhi yande ashepü akhua larü küma lashang;

¹²ATUNGPUH , arünü nü mükhemükimkhi dünkheak püpürü trükshihbo ki thüne ki athrihloang.

¹³Jumonü, isa nü mihtsürü tüsho nü yo rimlopung namfimihnubonü, lünnü nü ki makshe jihbah; isanü lünbo alala ki nü shijihkhi huhbah.