Read Yimchungru Naga M. Khün 81 Bible Online

M. Khün 81 - Yimchungru Naga bible

M. Khün 81

¹Isa sühmüh Thrünpuh ki achangnü khün thsang; Jakob Thrünpuh ki asühkhi düsheak thsang.

²Khün tankihang, züpzüppü kingang, bingshang tüsho bingkhung khungang.

³Khinu aso kim ching, khinu münichoki, isa arüngako anioji nimung hulipungpung mütang.

⁴Tümüde ha Israel thsungkheak yakzan thsükhi khülang, tüsho Jakob Thrünpuh yo yakzan khülang lah.

⁵Ha apinü Ijip azhihde wukhiukchoki, Josep thsungkheak yakzan khülang thsü, küpü ching isanü mümükheahkhi yutha isanü so.

⁶Apinü tha, inü nü ngam kheaknü hahmülang shuhkhijih; inü lotaklung hahbo shuhkhijih.

⁷Nünü küpkhukchoki ji, tüsho inü nü bekhit; inü tsüngmuk ajik dangpung chingnü nü ki alo, inü nü Meriba kebo ching rükakheah.

⁸O I mihtsürü, inü athakhi aniang; Israel, nünü I ki anishihnelah!

⁹Nüsa bolung khiungkerü thrünpuh mülade alabah; yungsho nüsanü khiungkerü thrünpuh mükingaün.

¹⁰I nüsa Ijip chingnü bekhitbuh, ATUNGPUH nüsa Thrünpuh; nüsa mün atonü kaang tüsho inü amishihbah.

¹¹Tüshe I mihtsürünü I düsheak mani, tüsho Israelnü I ki mihyumani.

¹²Jumonü inü arü nihbuh lümkhi ching tsahshihpü arü mulong müküppü jih.

¹³O, I mihtsürünü I ki anikhülaa, junangde Israelnü I limrobo ching tsahkhülaa!

¹⁴Inü nahde arü riribo junobah, tüsho arü azhihrü kilim I khah rholobah.

¹⁵ATUNGPUH thraneanrünü api miki trede mükhümbah, tüsho arü thsümüchi lünnü alabah.

¹⁶Inü nüsa a wheat hi atsüdaknü amütrübah, tüsho lungto ching yo mukhukenü nüsa reangkeamshihbah.