Read Yimchungru Naga M. Khün 88 Bible Online

M. Khün 88 - Yimchungru Naga bible

M. Khün 88

¹O ATUNGPUH , I akhümkhit Thrünpuh, inü animung tüsho are nü ki zhido.

²I tamkhüntamnü nü miki arüshang; inü azhikhi lim nü nükhün muphoang.

³Tümüde I me küpkhukbonü mide lah, tüsho I rhangdung kiuyuk thüninde yüchoh.

⁴Alokhün ching yüzahrü lung I kheyuka lah; I a sühmüh mülakhi mihtsürü nangde lah,

⁵asherü lung shuhmuwuh-a lah, laksah-a kiuyuk ching yaprü nangde, shepü nünü kheaküa mülümkhitcho, tüsho sherübo nü khah chingnü dükheaka la.

⁶Nünü I alokhün abobe, amiting, asük ching yapshihdo.

⁷Nü mulong zhipzhip I kheak mülangde lah, tüsho nünü nü ke abükkhibo alalanü I thsümüchi.

⁸Nünü I müyamrübo I kheaknü limshude tsoshih; nünü I arü ki athraneanbe kamshih; I rihdoa lah, tüsho I makhiukkhuk;

⁹Thsünükhi hode I mük keahkhia lah. ATUNGPUH , inü nimung aban nü ki jido; inü nü kilim I khahbo chungkihdo.

¹⁰Nünü asherü thsungkheak amüyinsahbe rhimoba de? Asherü asürübah nü shijihba de?

¹¹Nü muzhodakkhi kiuyuk ching yungsho nü thiyuro lakhi athsümünim ching khipkhitba de?

¹²Nü amüyinsahbebo amiting ching, tüsho nü thiyuro-lungki amihkhi lomi ching mükheahba de?

¹³Tüshe inü nü ki zhido, O ATUNGPUH , tüsho yapsu I tamkhüntamnü nü miki arüchoh.

¹⁴ATUNGPUH , tümüde nünü I me bahyuka la? Tümüde nü miro I kheaknü jika la?

¹⁵I athunuchokinü I thsünüshih tüsho ashepü thünina lah; arünü athsümüchikhi hahmülangnü I khibülaka lah.

¹⁶Nü mulong zhipzhip I kheak yükihdo; nü mihtrebe hode I dükheakshih.

¹⁷Jurübo nimung amuyung düchi nangde I mükamde arü; arü rukhühnü I zündoabah.

¹⁸Amuzhorü tüsho müyamrü nünü I kheaknü limshude tsoshih, tüsho amiting ju I müyamrükhung ah.