Read Yimchungru Naga M. Khün 91 Bible Online

M. Khün 91 - Yimchungru Naga bible

M. Khün 91

¹Shepü Khide Achang ajik dangpung ching lachonü Wuto alamme khüp labah.

²Inü ATUNGPUH dünkheak thabah, “Api I tsoyukpung tüsho I chipi; I Thrünpuh, api kheak inü akinbah.”

³Tsükjide apinü nü wuhnu-thsürü qimürip, tüsho ashebe arüm chingnü abekhitbah.

⁴Apinü nü api moghidungbonü alüpdobah, tüsho api ghidükeangbo khüp nü tsoyukbah; api yo thiyuro ju nü tsung tüsho tsungnini thsübah.

⁵Azhing mihtrebenü yungsho animung phinkhi hühzobonü nü trede müla,

⁶yungsho amiting ching lakhi arüm, yungsho animuro laksahbe athsümünim müla.

⁷Chithürü nü rheang ki, tüsho chithürü thürü nü khah tsülim keampü kuklah; tüshe ju nü thüninde marü.

⁸Nü mükbonü akheahbah, tüsho mihbukmuyuk thsümüchikhi ngübah.

⁹Tümütüsho nünü nü tsoyukpung ATUNGPUH , Khide Achang nü lapung thsü,

¹⁰amütsü tümünü nü müshik, yungsho arüm tümü nü lapung thüninde marü;

¹¹Tümüde apinü api yunirü nü limro alala aheangshihpü nü kurungkheak zojihbah;

¹²arünü nü arü khahbo ching düjitkihbah, junangde nü jing ju lung kheak mümükhe.

¹³Nünü kekhüzü tüsho jingto kheak nitbah, kekhüzü nunu tüsho phuruto nü müphü khüp jungbah.

¹⁴Tümütüsho apinü nihbuh amuzho I kheak zo, jumonü inü api bekhitbah; inü api achang kheak lashihbah, tümütüsho apinü I mung mükheahdo.

¹⁵Apinü I ki jibah, tüsho inü api ki alobah; küpkhuk ching I api lung labah; inü api bekhitbah tüsho api wüntrebah.

¹⁶Kutsüp hode inü api reangkeamshihbah, tüsho api ki I akhümkhit huhbah.