Read Yimchungru Naga M. Khün 97 Bible Online

M. Khün 97 - Yimchungru Naga bible

M. Khün 97

¹ATUNGPUHNÜ kiulongthsüchoh; alominü asühachihshang; mükhebinkhi kekung-lobonü asühachihshang!

²Amobo tüsho amitingnü api mükamdochoh; thiyuro-lungki tüsho thiyuro ju api kiulongthsü-binkiu khimtan ah.

³Api müngüh mo yüchoh, tüsho api riribo mükamphülapde aniuchoh.

⁴Api chinchobenü alomiküp yinchoh; alominü ngüchoh tüsho ajanchoh.

⁵ATUNGPUH miki müzüngbo thürip nangde, alomiküp Tungpuh miki niuthünakchoh.

⁶Yinmibonü api thiyuro-lungki khipkhitchoh, tüsho mihtsürü alalanü api müretahkhi ngüchoh.

⁷Sherünü mejak tankihcho, sherünü sangthsü dünkheak kükheangchonü alala achih ngüshang. Api kingaünang, nüsa thrünpuhbo alala.

⁸Zionnü sochoh tüsho asühchoh, tüsho nü mahkhapkhibo dünkheaknü Juda tsührübebo asühachihchoh, O ATUNGPUH .

⁹Tümüde ATUNGPUH , nü alomi alala kurungkheak changlah; nü a thrünpuhbo alala kumung shuhkih-a lah.

¹⁰Nüsa sherünü ATUNGPUH muzholanü, amütsü thraneanang! Apinü api yo amüsührü mebo kümchoh; apinü mihbukmuyuk khah chingnü arü bekhitchoh.

¹¹Thiyuro-lungkirü kheak ayin tahchoh, tüsho mulong ching lungkirü kheak asühpü lah.

¹²ATUNGPUH lung asühachihang, nüsa thiyuro-lungkirü, tüsho api amüsüh mung lümkhitde makshe jihang.