Read Yimchungru Naga Müchitmudu 1 Bible Online

Müchitmudu 1 - Yimchungru Naga bible

Müchitmudu 1

¹David tsührü, Israel kiulongthsüpuh Solomon müchitmudubo:

²Lümlung tüsho thsangdankhi mükheahpü, anikhitkhi yubo mütsankhitpü;

³lümlung thiyuro, mahkhap, tüsho alungki thsangdankhi leangkhipü;

⁴lümzülümdo thülihrü kilim lümlung, athunu mihtsürü kilim mükheahmudu tüsho adüngakhi jihpü —

⁵lümlung larü mihtsürünü anibah tüsho anikhitkhi alü thsübah, tüsho anikhitkhi mihtsürünü lümlung thiyankhi ngübah —

⁶müchitmudu tüsho shihdanglimyubo, lümlung thakhibo tüsho lümlung müchitbo anikhitpü thsungkheak.

⁷ATUNGPUH trekhi ju mükheahmudu akhuhbe ah, tüshe makharünü lümlung tüsho thsangdankhi bahyukchoh.

⁸I tsah-a, nü buhnü thsangdankhi aniang, tüsho nü benü thsangyukhi dübahyuk;

⁹tümüde jurübo nü ku kheak akhamdak zülubo tüsho nü hung mükamde lakbo thsübah.

¹⁰I tsah-a, amüneanrünü nü münitsho, hehuh düthsü.

¹¹Arünü athabah, “ Isa lung arang, isanü thiyih bukpü jimde aleanganü; isanü amüdopü mülade amülim mülarü thsungkheak jimanü;

¹²isanü arübo arhangnü Ashe-lomi nangde tüsho alokhün ching abümnü yüzahrü nangde muyuanü;

¹³isanü shoto kukrukbo mungji alala ngübah, isanü isa yambo ayankhikhinü amishihbah;

¹⁴arang tüsho isa lung beang, isa alala shopung khülang thsübah” —

¹⁵I tsah-a, arü lung düyü, arü jingshu ching düjung;

¹⁶tümüde arü jing amütsü lim alihchoh, tüsho arünü thiyih bukpü niokheamchoh.

¹⁷Tümütüsho wuhnu khürünü kheahde alachoki aphuhbe zokhi ju akeangkeang;

¹⁸tüshe arünü arü nihbuh thiyih thsungkheak aleangchoh, arünü arü nihbuh rhangdungbo thsungkheak jimde binchoh.

¹⁹Junangde alü thsüpü yihnelunerü limrobo lah; hanü atungrü rhangdung lude tsochoh.

²⁰Lümlungnü kiudunglimrobo ching achangnü jichoh; anihbenü wungdophulung ching adüsheak zhichoh.

²¹Chipibo kumung anihbenü zhichoh; kiuto chipiripitbo ching yüzahpung kheak anihbenü asukchoh:

²²Külokhüh nüsa lümlung thülihrünü nüsa athülih limrobo muzhoba? külokhüh nüsa kithsükilangrünü kithsükilangkhi ching asühba tüsho makharünü mükheahmudu thraneanba?

²³Inü athürühkhi lim rholoang; tsükjide inü I me nü kheak dungkihbah; inü I yubo nü ki mükheahshihbah.

²⁴Tümütüsho inü ji tüsho nünü reanglo, inü I khah chungkhit tüsho shenü manijih,

²⁵tümütüsho inü thsangdankhi alala nünü animuwuhabah tüsho inü athürühkhi müleangkhi,

²⁶inü she nü thsümütsüchoki münejihbah; küyimki nü atrebe arübanü inü luhmünebah,

²⁷küyimki nü atrebe chinthrüm nangde tüsho nü athsümünim chitmühean nangde, tüsho lümthsünü le tukmüsüp nü kheak arüba.

²⁸“Judüki arünü I ki jibah, tüshe inü malojih; arünü I düshihde ayimbah, tüshe arünü I müngü.

²⁹Tümütüsho arünü mükheahmudu thranean tüsho ATUNGPUH trepü mümokhit,

³⁰arünü inü thsangdankhi müleangkhi tüsho inü athürühkhi bahyuk,

³¹jumonü nünü tümü thülünlanü ju nü ngübah, tüsho nü rhimobonü nü tukhsüshihbah.

³²Arükari mümükheahrü mihtsürü ju arünü lümlung bahyukkhi hode shechoh, tüsho makharü reangkeamkhinü arü dükheakbah;

³³tüshe sherünü I ki anibanü khümkhita labah, tüsho amütsü trepü mülade tsüde alabah.”