Read Yimchungru Naga Müchitmudu 13 Bible Online

Müchitmudu 13 - Yimchungru Naga bible

Müchitmudu 13

¹Lümlung lakhi tsührünü abuhnü thsangdankhi anichoh, tüshe kithsükilangrünü a athürühkhi manichoh.

²Mihtsürü atsü a arünü athakhi thsungkheak thsambah ngübah, tüshe mülapmüjirü a athsümünim thsungkheak künde lah.

³Shepünü nihbuh mün kümkangchonü api rhangdung lachoh, tüshe shepünü mün tochonü athsümünimkhi labah.

⁴Yomuhyothsün mihtsürünü tümükhüh künkün she apinü küyimkishe ju müngü. Mürangde arhimorü a apinü akünkhi lüpdükhi ngübah.

⁵Thiyuro-lungkirünü arükchih thraneanchoh, tüshe mihbukmuyuknü achih tüsho mungchih hande arüchoh.

⁶Thiyuro-lungkinü amülim mülarü tsungdochoh, tüshe mihbukmuyuk ju aneakrübo keamshihpü lah.

⁷Khürünü nihbuh zangrü alarü khea luchoh, tütüshe tümü müla; tüsho khürünü nihbuh zangrü zhochihrü khea luchoh, tütüshe lakhit ato lah.

⁸Alarü mihtsürü a api rhangdung rhokhitpü anihbuh sho lubah, tüshe zhochihrü a shenü mümüzün.

⁹Thiyuro-lungkirü tsün yinatrümdo takchoh, tüshe mihbukmuyuk tsünpung mütchoh.

¹⁰Lülüshishikhinü rukachihpü lang akhiukshihchoh, tüshe tsüde thsangdankhi ju lümlung ah.

¹¹Thiyuro mülade lakhit ngükhi ju akheambah, tüshe shepünü rhimo hode hanmukhungchonü arünkihbah.

¹²Mulonglam atrütkhinü tukthsüde kamchoh, tüshe küyimki alunekhi dünjibanü, ha rhangdung sangdung ah.

¹³Shepünü thiyu mükhemükimbanü athsümünimbah, tüshe shepünü thiyukhüm trechonü thsambah ngübah.

¹⁴Lümlung yakzan ju rhangdung kenü, khürü ashepü müthrim chingnü rholoshihchoh.

¹⁵Anikhitkhi atsünü amuzho ngüchoh, tüshe thiyuro mülakhi ju athsümünim limro lah.

¹⁶Rükri lakhi mihtsürü abannü adüngakhinü rhimochoh, tüshe makharü a nihbuh makhakhi khimshuh mülih-a zolah.

¹⁷Mihbukmuyuk yunithsürü küpkhuk ching keamyukchoh, tüshe thiyuro lakhi limburünü mungtsü hande arüchoh.

¹⁸Shepünü adanyukkhi amümürang thsüchonü mükheakmürak tüsho achih ngükhi kamchoh, tüshe shepünü thsülangkhi anichonü wüntre jihchoh.

¹⁹Lunede alakhi akuk ngükhi ju me kilim niungde lah, tüshe makharübonü amütsü chingnü chamachihpü ju athraneanbe lah.

²⁰Shepü lümlung larü mihtsürü lung tsahchonü lümlung labah, tüshe makharü müyamrübo a athsümünimbah.

²¹Kuhi amütsünü aneakrübo müshamchoh, tüshe thiyuro-lungkirü ki a atsünü ashaklobah.

²²Mihtsürü atsünü api tsührü tsührübo kilim yamrüplurüp zojihchoh, tüshe aneakrü lakhit ju thiyuro-lungkirü thsungkheak hanmukhunga lah.

²³Zhochihrü mihtsürü lunü tsühyungbe suhdahde akhiukshihpü kuklah, tüshe thiyuro mülakhinü ju phüta bahchoh.

²⁴Shepünü tso zomuwuhchonü api tsührü thraneanchoh, tüshe shepünü api muzholanü kümkangde danchoh.

²⁵Thiyuro-lungkirü a arünü akünkhi tsühchoh, tüshe mihbukmuyuk bukbo a khümde lachoh.