Read Yimchungru Naga Müchitmudu 18 Bible Online

Müchitmudu 18 - Yimchungru Naga bible

Müchitmudu 18

¹Mihtsürü shepünü nihbuh zangrü khükhitchonü apinü nihbuh künkhi yimchoh; apinü lümlung mahkhap alala azhihchoh.

²Makharünü anikhitkhi ching asühkhi müla, tüshe nihbuh lümkhi huhkhi lang lah.

³Küyimki mihbukmuyuk arübanü, abahyukkhi she arüchoh; tüsho wüntre müjihkhi lungnü mungchih arüchoh.

⁴Mihtsürü mün yubo ke asükbo lah; lümlung kenü ju ayung bukkhi ah.

⁵Mihbukmuyuk ki jakkheah huhkhi yungsho thiyuro-lungkirü mahkhap ching bahyukkhi ju atsü yung.

⁶Makharü münküpbonü anihbuh kilim rukachihpü hande arüchoh, tüsho api münnü kinga lupü münitchoh.

⁷Makharü mün ju nihbuh thsümünimbe lah, tüsho api yunü nihbuh me phuhchoh.

⁸Jipjiprara yubo ju tsühyungpü akebe nangde lah; jurü mihtsürü pang ching yüzahchoh.

⁹Shepü nihbuh rhimo ching yomuhyothsün lanü tode athsümünimrü lung keoniorü ah.

¹⁰ATUNGPUH mung ju aheangsadam adüküng lah; thiyuro-lungkirünü ju lim shande yüchoh tüsho khümkhitchoh.

¹¹Alarü lakhit ju api kiuto amüküp lah, arünü ju chipi achang nangde lümchoh.

¹²Athsümünimpü müngüh mihtsürü mulong kükheangkhi lah, tüshe wüntrepü müngüh azhihayih lah.

¹³Shepünü musoyide alochonü, ha makhakhi tüsho nihbuh achihbe lah.

¹⁴Tukthsüde alachoki mihtsürü ju menü alashihbah, tüshe me thsümünimsho shepünü arümkhukba?

¹⁵Lümlung larü mulongnü mükheahmudu ngüchoh, tüsho lümlung larü nükhünnü mükheahmudu yimchoh.

¹⁶Mihtsürü thsambahnü nihbuh limro khimshuhchoh, tüsho adungto mihtsürü miki api bede arüchoh.

¹⁷Mahkhappung ching akhuh mihtsürünü athakhi ju anihbuh azhihrünü api ki keokhipü mütankihyi khiungde kamruhroro alim nangde lachoh.

¹⁸Sühmüh lakhi mihtsürü mahne mahkhappung ching azhihachihsho, azan thsükhinü neamneamruru mülüpü kuklah.

¹⁹Keoniorünü arungkhi ju amüküp kiuto nangde lah, tüshe rukachihkhi ju chipiripit khrihbebo nangde lah.

²⁰Nihbuh münnü aso asokhinü mihtsürü bukthsüchoh; anihbuh mün chingnü akhiukkhinü api reangkeamchoh.

²¹Ashekhi tüsho rhangdung mulo wu ching lah, tüsho sherünü ju muzhochonü ju sangaso tsühbah.

²²Shepü niuberü ngüchonü atsü ngüchoh, tüsho ATUNGPUH kilimnü amuzho ngüchoh.

²³Zhochihrünü mihmüthsüm thsungkheak mushuchoh, tüshe alarünü alungdonü alochoh.

²⁴Khürü müyamrü thsükhea rünmukhiung, tüshe keoniorü kheaknü alü dakkihde alakhi müyamrü khülang lah.