Read Yimchungru Naga Müchitmudu 20 Bible Online

Müchitmudu 20 - Yimchungru Naga bible

Müchitmudu 20

¹Yukhu ju luhmüne, amüshangbe ju arhungangüm, tüsho shepü hadürünü bephülapde tsochonü lümlung larü yung.

²Kiulongthsüpuh bukmükekhi ju kekhüzü arungkhi lah; shepünü küdah thsüde bukakhiukchonü nihbuh rhangdung azhihde neak yihbeakchoh.

³Atsangachihpü tuklokhi ju mihtsürü wüntrepü lah, tüshe makhakhinü nahde rukachihshihchoh.

⁴Yomuhyothsünrünü akheahmünchi ching muwochak; jumonü yimlupü kim ching api tümü müngüchoh.

⁵Mihtsürü mulong ching lümkhi ju ke asükbo nangde lah, tüshe anikhitkhi mihtsürünü khipkhita luchoh.

⁶Mihtsürü ahihdonü nihbuh tsükhi thachoh, tüshe thiyuro mihtsürü shepünü ayimkhitkhukba?

⁷Thiyuro-lungki mihtsürünü nihbuh thiyuro ching tsahchoh; api dunglim atsührübo müngühmühia lah.

⁸Küyimki kiulongthsürü khülang nihbuh kiulongthsü-binkiu kheak mahkhappü binbanü api mükbonü amütsü alala yünkhita bahchoh.

⁹“ Inü I mulong müsühde kamshihdo, I neak chingnü I a tsangkhitlah” de shenü thakhukla?

¹⁰Thiyuro mülakhi adünara tüsho akeara ane chido ATUNGPUH kilim athraneanbe lah.

¹¹Azürü khülang ju she anihbuh rükrirükko atsangkhit tüsho alungki lakhi api rhimonü mükheahchoh.

¹²Asopü nükhün tüsho angüpü mük ane chido ATUNGPUHNÜ thrünjihdo.

¹³Ayappü dümuzho, jude yungsho nü zhochihrü kambah; makeangde laang tüsho nü tsühpü suhdahde alabah.

¹⁴Athulorünü kamruhroro adün hihlah de dapdaprarachoh, tüshe küyimki api tsokhiabahbanü nihbuh thülihde athulokhi dünkheak kükheangchoh.

¹⁵Suna tüsho shotomürüm-lung hihdakde lah, tüshe mükheahmudu asukkhi münküpbo nükde alakhi ju mürelung ah.

¹⁶Khürünü khiungkerü mah dünkheak hahmülang lupü alokhisho nihbuh lakhit jihlopü thsüde thiyuchihchimang.

¹⁷Akeangyu thade alü thsükhi yikhap ju mihtsürü ki niunglah, tüshe ju dunglim api mün lozünü amibah.

¹⁸Athsunganah yimde lümkhibo thsang; thirithsüpü lasho, lümthiyan luang.

¹⁹Münjipjiprünü aramyu thakhitchoh; jumonü tsaktsakrururü lung datruachih.

²⁰Shepünü abuh yungsho abe athrubanü kheahde amitingkhi ching api tsünpung mütabahbah.

²¹Atankih ching niokheamde alü thsükhi lakhit ju akheam ching müngühmühi mülade akambah.

²²“ Inü amütsü athrihlobah” de dütha; ATUNGPUH aleangang, tüsho apinü nü khümkhitbah.

²³Thiyuro mülakhi adünara ju ATUNGPUH kilim athraneanbe lah, tüsho arükchih akeara ju atsü yung.

²⁴Mihtsürü jingdükübo A TUN GPU H kilimnü lah; dale küde thsah mihtsürünü nihbuh limro mükheahkhukpü?

²⁵Tümükhüh nanachihde müsühkhitde kingaünbah ashulim api thiyuchihchim lümloakheahkhi ju mihtsürü thsungkheaknü müthrim khülang lah.

²⁶Lümlung lakhi kiulongthsürünü mihbukmuyuk yünkhita bahchoh, tüsho arü kheak thsam phülütchoh.

²⁷Mihtsürü me ju nihbuh mulong alunglim asükbo alala yimkhi ATUNGPUH tsünpung ah.

²⁸Mihmüthsüm tüsho thiyuronü kiulongthsüpuh küma lashihchoh, tüsho amuzhokhinü apinü anihbuh kiulongthsü-binkiu tholobah lachoh.

²⁹Athunurü müretahkhi ju arü sühmüh, tüsho ashinbuhrü wünkihkhi ju arü ku buyiukkhi ah.

³⁰Adamkhi tüsho mübonü amütsü müsüh-a bahchoh, tüsho alakkhibonü mulong alunglim tsangkhitchoh.