Read Yimchungru Naga Müchitmudu 21 Bible Online

Müchitmudu 21 - Yimchungru Naga bible

Müchitmudu 21

¹Kiulongthsürü mulong ju ATUNGPUH khah ching lah; ke yungbo nangde apinü külimpeang lümlanü thsüphülapchoh.

²Mihtsürü limrobo alala nihbuh mük ki alungki lah, tüshe ATUNGPUHNÜ mulongbo adünchoh.

³Laksah-a kingaünkhi kheaknü thiyuro-lungki tüsho thiyuro rhimopü ju ATUNGPUH kilim alü aleangkhikhukbe lah.

⁴Mük-müzhingkhi, kükheangküyang mulong tüsho mihbukmuyuk ju neak ah.

⁵Düshihde lümkhi thsükhi ju tsükjide suhdah lim bechoh, tüshe shepü dakdakthsüthsüchonü zholümchoh.

⁶Akeangyu mulo hode angükhi lakhitbo ju nahde akheambe kesheak tüsho ashebe müthrim ah.

⁷Mihbukmuyuk athsümünimnü arü dükheakbah, tümütüsho arünü thiyuro rhimopü reanglochoh.

⁸Amülim mihtsürü limro khüranglah; tüshe amülim mülarü rhimo alungki lah.

⁹Dapdaprararü niuberü lung thüyam ching lakhi kheaknü a damzü mühit ching lakhi atsübe ah.

¹⁰Mihbukmuyuk menü amütsü mürühchoh; anihbuh yamhingrünü api kheaknü tümü amuzho müngüchoh.

¹¹Küyimki luhmünerü thsümüchibanü, lümthülihrü lümlung ngüchoh; küyimki lümlung lakhi mihtsürü thsangdanbanü, apinü mükheahmudu ngüchoh.

¹²Thiyuro-lungki Thrünpuhnü mihbukmuyuk yam ching tümü dünjichonü mükheahlah, tüsho mihbukmuyuk thsümünima keamshihchoh.

¹³Shepünü zhochihrünü azhikhi lim nükhün yihdochonü, anihbuhnü she azhibah tüsho musojihde alabah.

¹⁴Ramde ajihkhi thsambahnü bukakhiukkhi keamloshihchoh, tüsho dunglim lakhi buknimnü bukmüke tukloshihchoh.

¹⁵Thiyuro larünü thiyuro rhimokhi ju asühachihpü lah, tüshe amülim rhimorü kheak atrebe arübah.

¹⁶Mihtsürü shepü anikhitkhi limro chingnü rümde tsahchonü asherü bolung sühakhimbah.

¹⁷Shepünü shih asühkhi muzhochonü zhochihrü kambah; shepünü yukhu tüsho müdangke muzhochonü alarü müthsü.

¹⁸Mihbukmuyuk ju thiyuro-lungki thsungkheak arhokhitbe, tüsho akin mülakhi ju alungkirü thsungkheak labah.

¹⁹Dapdaprara tüsho bukakhiukkhi niuberü lung lamusung a sunglo ching lakhi atsübe.

²⁰Shoto rahpungbo ju lümlung lakhi mihtsürü lapung ching lah, tüshe makharünü a ju phinphurukchoh.

²¹Shepünü thiyuro-lungki tüsho amüthsüm yimchonü rhangdung tüsho wüntrepü ngüchoh.

²²Rük lakhi mihtsürünü amürang kiuto yanchoh, tüsho mulonglamde alakhi chipi thokheamchoh.

²³Shepünü nihbuh mün tüsho mulo kümkangchonü küpkhukbo chingnü api me tsokhitchoh.

²⁴Lülüshishi tüsho akükheang mihtsürü mung ju, “ Luhmünerü”; apinü lülüshishide kükheangchoh.

²⁵Yomuhyothsünrü tsühneyungnekhinü api laksahbah, tümüde api khahbonü rhimopü thsunglo.

²⁶Nimung amuyung apinü alü tsühneyungnede la, tüshe thiyurolungkirünü a aninga muzode jihchoh.

²⁷Mihbukmuyuknü shuhmülanga jihkhi ju athraneanbe; mihbukmuyuk lümkhi thsüde apinü hande arükhi a küdükhüh she alaba!

²⁸Arükchih thiyumütsan adükheakbah, tüshe düshihde lümakheahrü yu rünkhiungbah.

²⁹Mihbukmuyuk mihtsürünü nihbuh miro müküpde kamchoh, tüshe alungkirünü a nihbuh limro lümakheahchoh.

³⁰ATUNGPUH azhihde lümlung yungsho anikhitkhi yungsho lümthiyan tümü müla.

³¹Khora ju thirithsü nimung thsungkheak thsakhamlah, tüshe akuk ngükhi ju ATUNGPUH yo.