Read Yimchungru Naga Müchitmudu 22 Bible Online

Müchitmudu 22 - Yimchungru Naga bible

Müchitmudu 22

¹Lakhit ato kheaknü mung atsü mokhitbeah, tüsho shotoyinchi le suna kheaknü amuzho atsübe.

²Alarü tüsho zhochihrü rukhüh shoruachihchoh; ATUNGPUH ju arü alala thrünrü ah.

³Rük larünü atrebe ngübah jikchoh; tüshe lümlangrünü judü lang yüchoh tüsho thsünüa luchoh.

⁴Azhihayih tüsho ATUNGPUH trekhinü lakhitbo, wüntre tüsho rhangdung lah.

⁵Ayangbo tüsho müthrimbo mulomülaprü limro ching lah; shepünü nihbuh me kümchonü jurü kheaknü limshude alabah.

⁶Azürü khülang ju api yüpü limro ching thsangyukhitang, tüsho küyimki api azorü kambanü ju chingnü müchamkhi.

⁷Alarünü zhochihrü kurungkheak yakzan shuhchoh, tüsho shonip-lurü ju anip-jihrü yamlarü ah.

⁸Shepünü amütsü hiuchonü küpkhuk yimluchoh, tüsho api bukmükekhi tso thsümünimbah.

⁹Salarü mihtsürü a nihbuh müngühmühibah, tümüde apinü zhochihrü kilim api tsühyungbe jihchoh.

¹⁰Luhmünerü yankhita bahang, tüsho marüpachihkhi tsobah, tüsho rukachihkhi le mükhemükim thakhi arün thsübah.

¹¹Shepünü mulong amüsüh muzhocho, tüsho nihbuh yu ching amüthsüm lanü kiulongthsüpuh ju api müyamrü labah.

¹²ATUNGPUH mükbonü mükheahmudu kheahde lachoh, tüshe apinü akin mülarü yubo bahjihchoh.

¹³Yomuhyothsün mihtsürünü thachoh, “Wungdo ching kekhüzü lah! I a wungdophulung ching nguhsahbah!”

¹⁴Yüliyüra liberü mün ju alokhün asük lah; shepü ATUNGPUH bukakhiukkhi khüp lanü ju ching keambah.

¹⁵Makhakhi ju azürü mulong ching rhükkih-a lah, tüshe adanyukbe tsonü api kheaknü limshude tsoshihchoh.

¹⁶Nihbuh lakhit jakihpü thsüde shepünü zhochihrü junocho, tüsho shepünü alarü kilim jihchonü ane chido zhochihrü kambah.

¹⁷Nü nükhün muphoang tüsho lümlung larü yubo aniang, tüsho I mükheahmudu lim nü mulong jihang;

¹⁸tümüde jurü nü kheak zosho asühpü lah; jurü alala nü münküpbo kheak kihshang,

¹⁹junangde nünü ATUNGPUH kheak kinbah; inü khihni nü ki thsangyuchoh.

²⁰Inü nü thsungkheak lümthiyan tüsho mükheahmudu samrü müthrüt de,

²¹nü ki alungki tüsho thiyuro huhpü; junangde nü thiyirü ki nünü thiyuro alobah?

²²Zhochihrü ki api zhochihmonü aram-mihshik düthsü, yungsho mahkhappung ching müthsümülarü düthsümüchi;

²³tümüde ATUNGPUHNÜ arü dünkheak atsangbah tüsho sherünü arü yankhia luchonü yankhia lubah.

²⁴Bukakhiuk mihtsürü lung müyamrü düthsü tüsho bukmüke mihtsürü lung düyü,

²⁵jude yungsho nünü api limrobo mükheahbah tüsho nü me thsungkheak müthrim zobah.

²⁶Khürü mah hahmülang lupü thiyuchihchim düthsü.

²⁷Nünü müshakkhukpü thsüsho, arünü nü yapkiu she lude atsobah.

²⁸Nüsa jipürünü akhimkhi jipü arelung düshuhakhin.

²⁹Mihtsürü khülang api rhimo ching yeanzamkhi nünü ngüchonah? Api kiulongthsürübo miki zhipbah; api a mümükheahkhi mihtsürübo miki müzhip.