Read Yimchungru Naga Müchitmudu 25 Bible Online

Müchitmudu 25 - Yimchungru Naga bible

Müchitmudu 25

¹Harü ha Juda kiulongthsüpuh Hezekia mihtsürübonü thrüta lukhi Solomon müchitmudubo ah:

²Tümükhüh müyimpü ju Thrünpuh müretahkhi, tüshe tümükhüh yimkhitpü ju kiulongthsürübo müretahkhi lah.

³Thüning ju changlah tüsho alomi ju süklah, junangde kiulongthsürübo mulong ju müyimkhitkhuk.

⁴Shotoyinchi chingnü achangkhitkhi yihkhita bahang, tüsho ju shotoyinchi-kingrü thsungkheak kukruk kamchoh;

⁵kiulongthsürü mikinü mihbukmuyuk bede tsoang, tüsho api kiulongthsü-binkiu thiyuro-lungki ching labah.

⁶Nü küdah thsüde kiulongthsürü miki düshuhkih, tüsho adungto mihtsürü dangpung ching düzhip;

⁷apinü nü ki, “Ha ching akihang,” de athakhi ju nü mükbonü angükhi yakzanshuhrü miki nü abobe kamkhi kheaknü atsübe labah.

⁸Mahkhappung ching niokheamde düyü; tümüde nü yamhingrünü nü achih kipchoki akheam ching nünü tümü thsüba?

⁹Nü atsangachihpü lakhi ju nü yamhingrü ki lang thaachihang, tüsho aramyu püpürü ki düthakhit;

¹⁰jude yungsho shepünü ju sobanü nü achih lahkhitjihbah, tüsho nü mung atsü thsümünimbah.

¹¹Thiyu ayede asukkhi ju shotoyinchi ching suna mukhiukbo thürüngkhi nangde lah.

¹²Lümlung lakhi mihtsürünü athürühkhi ju anide alakhi nükhün ching suna nüpü yungsho suna atsüdak zülu nangde lah.

¹³Thiyuro yunithsürü ju anihbuh thiyirü ki yimlu kim ching rüngmükhingdo alakhi phürüm nangde lah, tümüde apinü nihbuh putungrübo me rhüngrhüngshihchoh.

¹⁴Shepünü arükchihnü jihchungkhi kheak kükheangchonü tsüng mübekhi amobo tüsho apung ruk ah.

¹⁵Arümkheamkhi hode yakzanshuhrü rükyukpü kuklah, tüsho mulo athünaknü ro yihshakpü kuklah.

¹⁶Nünü mukhuke ngüsho, nü kün thülün lang tsühang, jude yungsho hihde tsühbah nü amülümbah.

¹⁷Nü yamhingrü yam ching lakkhilakyuk lang tsahyukang, jude yungsho apinü nü mukhiuka bahbah tüsho nü thraneanbah.

¹⁸Mihtsürü shepünü nihbuh yamhingrü azhihde thiyumütsan thsüchonü shitso, nukshang, tüsho hühzo nangde lah.

¹⁹Küpkhuk kim ching thiyuro mülakhi mihtsürü kheak düthsün angükhi ju hü amütsü tüsho jing nüpkhi ruk ah.

²⁰Shepünü lümthsünürü ki khünbo thsüchonü, athsak nimung khimmih lude atsokhi nangde yungsho mü ching asanke yukkhi nangde lah.

²¹Nü riri khümsho, api kilim atsühpü yikhap jihang; tüsho api kethürisho, api kilim ayungpü ke jihang;

²²junangde nünü api ku kheak mokhih lamlamkhi mujungshihbah, tüsho ATUNGPUHNÜ nü thsambah jihbah.

²³Dukulim pungnü tsüng bede arüchoh, tüsho dünthamungthanü bukakhiuk hande arüchoh.

²⁴Dapdaprara niuberü lung thüyam ching lakhi kheaknü a damzü mühit ching lakhi atsübe.

²⁵Limshu lomi chingnü thiyusheak atsü sokhi ju kungde kethüride alachoki kerüng yungkhi nangde lah.

²⁶Thiyuro-lungki mihtsürü shepünü mihbukmuyuk ki ayeachihchonü akhimniuhniuh kenü yungsho azhihzhihkhi kekhip nangde lah.

²⁷Mukhuke hihde atsühkhi, yungsho nihbuh mungshipü yimkhi ju atsü yung.

²⁸Shepünü nihbuh müdanyuknü chipi keamabahkhi kiuto nangde lah.