Read Yimchungru Naga Müchitmudu 30 Bible Online

Müchitmudu 30 - Yimchungru Naga bible

Müchitmudu 30

¹Jakeh tsührü Agurnü müchitkhi yubo: Ha mihtsürünü Ithiel ki — Ithiel tüsho Ukal ki khipkhit:

²“Tsükjide I a mihtsürü alala kheaknü makhakhi lah, tüsho I a mihtsürünü anikhitbe müla.

³Inü lümlung manikhit yungsho Amüsühbuh mükheahmudu she müla.

⁴Shepü yinmi ching yükihbah akilokhea? Shepünü amüyi ching apung zhimkhea? Shepünü khim chingnü ke dümkhea? Shepünü lomi aredungbo thsüjihkhea? Nünü mükheahlasho, api mung she a, tüsho api tsührü mung she a?

⁵“Thrünpuh yu aban atsangkhitkhi lah; api kheak kinrü kilim api ju tsung ah.

⁶Api yubo ching düyukajak, jude yungsho apinü nü thürühbah tüsho nü akeangyu tharü ah de amütsanbah.”

⁷O ATUNGPUH , I müsheyiki mungji mahne lashihpü inü nü ki keokhichoh:

⁸I kheaknü arükchih tüsho akeangyu limshude kamshang; I alarü yungsho zhochihrü she dükamshih. I nimung aban yikhap lang jihang;

⁹jude yungsho hihde alabah tüsho nü reanglode athabah, “ATUNGPUH ju she a?” Yungsho I zhochihbah tüsho ahühbah, tüsho I Thrünpuh mung müneanjihbah.

¹⁰Yamlarü khülangnü nihbuh putungrü düchikhi, jude yungsho apinü nü athruajibah tüsho ju dünkheak amülim thsübah.

¹¹Mihtsürü khürü arü buhrü athruajirü tüsho arü berü mümüngühjihrü lah.

¹²Mihtsürü khürü arü nihbuh tsangkhitlah de alümrü lah tüshe arü müneankhi müsüh-a mübah.

¹³Mihtsürü khürü mükjibo khide müzhingde, khenoabahde kheahchoh.

¹⁴Mihtsürü khürü arü hü nukshangbo nangde, arü shihtsüh hü mükjibo nangde, alomi chingnü zhochihrü tüsho mihtsürü bolungnü mükheakmürakrü muyuabahpü lah.

¹⁵Awah tsührübe mahne lah; anenü khungchoh, “ Ka! Ka!” Küyimkishe reangmükeamkhi mungji phüyi lah:

¹⁶Ashe-lomi, aniungyüh liberü, küyimkishe kemürikhi lo, müphimütkhukde atakkhi mo.

¹⁷Shepünü nihbuh abuh luhmünechonü yungsho shina lachoki abe mükhemükimbanü müleangtopübo yungsho khüyakbonü api mükjibo mukiukhita tsühabahbah.

¹⁸Inü anikhitpü thsüde khide chakde alakhi mungji phüyi lah:

¹⁹Müleangnü thüning ching phinkhi, phurutonü lungto kheak chinkhi, sangkungnü keto mi kheak alimro yimkhitkhi, tüsho athrürü le aliberü muzhoachihkhi.

²⁰Müzammüram liberünü arhimokhi limro ha lah: alibenü tsühchoh tüsho amün nana bahchoh, tüsho thachoh, “ Inü amülim tümü mürhimo.”

²¹Alominü marümkhukkhi mungji phüyi lah:

²²Azhorü khülang kiulongthsürü kamkhi, makharü khülang nihbuhnü atsühnekhi alala lakhi,

²³athranean liberü yamkhün kamkhi, tüsho yamlaberünü nihbe putungbe thrimkhita bahkhi.

²⁴Alomi kheak lakhi mungji phüyi anini lah, tüshe arübo khide lümlung lah:

²⁵Müjebo ju sühmüh mülakhi lorilokobo, tüshe arünü muzhu ching arü tsühyungbe shumukhunga zochoh.

²⁶Lungthsühribo sühmüh müla, tüshe arünü lungto bolung arü yambo thsüchoh.

²⁷Tangkhobo arü kiulongthsürü müla, tüshe arünü khin thsübah yüchoh.

²⁸Mutruktrukbe ju khah ching rama shuhpü kuklah, tüshe nünü arü kiulongthsürü-yambo ching ngübah.

²⁹Arü tsahkhi khide tsüde akheahkhi mungji phüyi lah:

³⁰Kekhüzübo, shiwüh bolung sühmüh lah tüsho sheshe mütre;

³¹mihnubo, thunupung angamde atsahkhi, tüsho api bonungrünü mükamdoa lakhi kiulongthsürü.

³²Nü makhade nü zangrü shuhkih-a lasho, yungsho nünü amütsü asah-a lasho, nü khahnü nü mün hümang.

³³Tümüde niuhke rhukhinü akingkung akhiukchoh, tüsho nupung thünitkhinü thiyih müyanchoh, junangde bukmükekhinü rukachih akhiukchoh.