Read Yimchungru Naga Müchitmudu 31 Bible Online

Müchitmudu 31 - Yimchungru Naga bible

Müchitmudu 31

¹Harü ha kiulongthsüpuh Lemuel abenü anihbuh ki thsangyukhi müchit yubo:

²“O I tsührü, I nuyam tsührü, O I thiyuchihchimkhi tsührü,

³nü sühmüh aliberü kilim düjih, yungsho kiulongthsürü thsümünimrü kilim nü limrobo dütsang.

⁴Ha kiulongthsürübo thsungkheak yung, O Lemuel, kiulongthsürübonü yukhu yungbe yung, yungsho amüshangbebo ju yakzanshuhrü thsungkheak yung;

⁵jude yungsho arünü ayungbah tüsho yakzan mihbah, tüsho junoa larü alim alala khenoabahbah.

⁶Phapke ju adükheakpü larü tüsho yukhu ju thsünüde alarü thsungkheak ah.

⁷Arünü yungshang tüsho arü mükheakmürak tüsho masühkhi mihabahshang.

⁸“Nihbuh küdah thsüde masukkhukrü thsungkheak thajang. Arung mülarü alala alim kümdojang.

⁹Nü mün khimshuhang, thiyuro-lungkinü mahkhapang, tüsho zhochihrü le müthsümülarü alim tsungdojang.”

¹⁰Athülünkhi yamkhünberü shenü angükhukba? Alibe thülünkhi ju mürezhingzhing kheaknü alü ah.

¹¹Anihbe yamkhünbuhnü alibe kheak mulongram alala lah tüsho api alü mülade müthsü.

¹²Anihbe rhangdung amuyung alibenü api ki atsü thsüchoh tüsho amütsü yung.

¹³Alibenü alamlam-hing tüsho athünak-hing yimchoh tüsho anihbe khahbonü künsahde rhimochoh.

¹⁴Alibe ju shothsümolorü sangkungbo nangde lah, alibenü limshu chingnü anihbe tsühyungbe hande arüchoh.

¹⁵Alibenü anihbe yambuk tsühyungbe mozümodopü tüsho ayamlaberünü arhimopü thiyipü müyinkhiyide asürüchoh.

¹⁶Alibenü alo kheahchoh tüsho ju thulochoh, tüsho anihbenü amulokhi chingnü kurungasolu thsüchoh.

¹⁷Alibe ju müküpde arhimorü, sühmüh larü tüsho kukikurarü ah.

¹⁸Anihbe shothsümolo atsü ah de alibenü mükheahlah, tüsho azhing ching ashude rhimochoh.

¹⁹Alibenü anihbe hing chiyima khim keakchoh.

²⁰Alibenü zhochihrü tüsho müthsümülarü ki salade lah.

²¹Alibenü phürüm shuchoki mulong müsansan, tümütüsho anihbe yamkhün a alamlam khimmih lah.

²²Alibenü yapkiu khimbe keakchoh tüsho mürümmuchukhi athünak khimbo phuyuchoh.

²³Anihbe yamkhünbuh ju lomi azothsürü bolung chipiripit ki binchoki wüntre jihchoh.

²⁴Alibenü athünak khimmihbo keaka yinchoh, tüsho arümkihbebo yinzüyindorü kilim jihchoh.

²⁵Sühmüh tüsho wüntre ju anihbe khimmih; arüpü lakhi kim ching alibe asühbah.

²⁶Alibenü lümlung bede amün khimshuhchoh, tüsho anihbe mulo kheak thsangdankhi lah.

²⁷Alibenü anihbe yambuk rhimorhiyi kurungkheak kheahchoh tüsho yomuhyothsün yikhap mütsüh.

²⁸Anihbe tsührübo asürüchoh tüsho alibe ki müngühmühi de jichoh; api yamkhünbuhnü she alibe shijihchoh:

²⁹“Aliberü ahihdonü tsüde rhimodo, tüshe nünü arü kiholah.”

³⁰Amürühkhi ju mülapmüji tüsho jaktsükhi akeangkeang, tüshe aliberü shepünü ATUNGPUH trechonü, anihbe shijihbeah.

³¹Anihbe khah-rhimo sangaso alibe kilim jihang, tüsho anihbe rhimonü chipiripitbo ching alibe shishang.