Read Yimchungru Naga Müchitmudu 4 Bible Online

Müchitmudu 4 - Yimchungru Naga bible

Müchitmudu 4

¹I tsührübo, buhrünü thsangdankhi aniang, tüsho anikhitkhi mükheahpü kurhangang;

²tümüde inü nü ki atsü yukhümbo jihchoh; I yakzan dübahyuk.

³Küyimki I buh tüsho I be miki I azürü nunu lakhea,

⁴apinü I ki thsangyu tüsho tha: “Nü mulongnü I yubo zoang; I yukhümbo zoang tüsho laang.

⁵Lümlung ngüang! Anikhitkhi ngüang! Dümihabah, yungsho I yubo chingnü rholode dütso.

⁶Anihbe dübahyuk, tüsho anihbenü nü küma lashihbah; anihbe muzhoang, tüsho anihbenü nü aheangbah.

⁷Lümlung ju khide adungto lah; jumonü lümlung ngüa lung. Nü ngükhi alala kheaknü, anikhitkhi ngüa lung.

⁸Anihbe shuhkihang, tüsho anihbenü nü shuhkihbah; nünü anihbe kheak kapkihchoki, anihbenü nü kilim wüntrepü hande arübah.

⁹Anihbenü nü ku kheak amüthsüm zülu yihkihjihbah; anihbenü nü kilim müretah kuthran jihbah.”

¹⁰Aniang, I tsah-a, tüsho inü athakhibo leangkhiang, tüsho nü rhangdung kambo hihde alabah.

¹¹Inü nü lümlung limro chingnü thsangyudo; inü alungki tsahpungbo ching nü bedo.

¹²Küyimki nü tsahbanü, nü jingdükübo mümürhemükhip, tüsho küyimki nü ashanbanü nü jing mümükhe.

¹³Thsangdankhi düngde tholoang, dütsoshih; ju tsüde aheangang, tümüde ju nü rhangdung ah.

¹⁴Mihbukmuyuk tsahpung ching düyüzah, tüsho amütsü limro ching dütsah.

¹⁵Ju bahkhiang, ju kheak dütsah; ju chingnü rholoang tüsho hode tsoang.

¹⁶Tümüde arünü amütsü mürhimoyikia arü müyapchoh; arünü khürü mükeamshihyikia arü yapshede müyü.

¹⁷Tümüde arünü mihbukmuyuk yikhap tsühchoh, tüsho athsümünimbe yukhu yungchoh.

¹⁸Tüshe alungki tsahpung ju ani akhiukde animuro alü yinde atahkhi nangde lah.

¹⁹Mihbukmuyuk limro ju amiting nangde lah; tümünü arü jing mükheshihchonü arünü mümükheah.

²⁰I tsah-a, I yubo aniang; inü athakhibo lim nü nükhün muphoang.

²¹Jurü nü mükbo chingnü düchamachihshih; jurü nü mulong ching zoang;

²²tümüde arü ju arü ngürü kilim rhangdung, tüsho arü pang alala kilim shihphü atsü ah.

²³Nü lümzülümdokhi kümkangang; tümütüsho ju kenü ah.

²⁴Mülapmüji mün, tüsho thsüpkhilukhi münküpbo nü kheaknü dükhea tsoshang.

²⁵Nü mükbo mikhuhlim langakindo kheahang, tüsho nü müngühlim mürüngang.

²⁶Nü jing tsahpung lümakheahang, tüsho nü limrobo alala mütsanang.

²⁷Tsülim yungsho huzulim danguh; amütsü chingnü nü jing atrütang.