Read Yimchungru Naga Müchitmudu 5 Bible Online

Müchitmudu 5 - Yimchungru Naga bible

Müchitmudu 5

¹I tsah-a, I lümlung aniang; tüsho I anikhitkhi lim nü nükhün muphoang,

²junangde nünü adüngakhi lashihbah tüsho nü münküpbonü mükheahmudu zobah.

³Tümüde yüliyüra liberü münküpbonü mukhuke atsamkhichoh, tüsho amün ju müdangke kheaknü ashahshahbe ah;

⁴tüshe akheam ching a anihbe ju shihsu nangde, thrip aban ayuk nukshang nangde lah.

⁵Anihbe jing ashepü ching yüzahchoh, anihbe jingdükübo kiuyuk lim lah.

⁶Anihbenü rhangdung limro lümamükheah; anihbe tsahpungbo khüranglah, tüshe alibenü ju mümükheah.

⁷Jumonü I tsührübo, kheakü I ki aniang, tüsho I yubo chingnü düchamachih.

⁸Alibe kheaknü nü limro shude akhinang, tüsho anihbe yam ripit thüninde düyü,

⁹jude yungsho nü wüntrekhi nünü püpürü kilim tüsho alungkhangrü kilim nü kambo jihbah;

¹⁰jude yungsho nü lakhitnü hanrübo bukthsübah tüsho nü khisahkhibo khiungkerü yam ching yübah;

¹¹tüsho nü shih le nü pang tsühabahshu akheam ching nünü tüzhochoh,

¹²tüsho thachoh, “ Küdükhüh inü thsangdankhi thraneande, tüsho athürühkhi I mulongnü abahyukkhea!

¹³Inü I thsangyurübo düsheak mani, yungsho I thsangdanrü kilim I nükhünbo mümupho!

¹⁴I a athsümünimpü tsangde, amukhungrü alala bolung lakheah.”

¹⁵Nü kekung kiukhi chingnü, nü kekhip chingnü abukkhi ke yungang.

¹⁶Nü kenübo khiungke lim, yungzü kebo kiudunglimrobo ching hiumüzütshihba de?

¹⁷Arübo nü yo lang thsüshang, tüsho hanrübo thsungkheak yung.

¹⁸Nü kenü müngühshang, tüsho nü athunuchoki yamkhünbe lung asühachihang.

¹⁹Amuzhokhi shihmüchi tüsho drelü nangde, kim alala ching anihbe treangbonü nü reangkeamshang; tüsho kamruhroro anihbe amuzhonü nü kapdoshang.

²⁰I tsah-a, tümü thsüde nü yüliyüra liberünü akapdoshihpü, tüsho müzammüramrü khüh kheak kapshihpü?

²¹Tümüde mihtsürü limrobo ATUNGPUH mükbo ki lah, tüsho api tsahpungbo alala apinü ajama kheahchoh.

²²Mihbukmuyuk mihtsürü ju nihbuh amülimbo ching phuhchoh, tüsho anihbuh neak liubo ching api phuh-a lah.

²³Thsangdan mülakhinü api ashebah, tüsho nihbuh makhakhi ato ching api tsophülapbah.