Read Yimchungru Naga Müchitmudu 6 Bible Online

Müchitmudu 6 - Yimchungru Naga bible

Müchitmudu 6

¹I tsah-a, nünü nü müyamrü thsungkheak hahmülang lua lasho, nünü hanrü thsungkheak thiyuchihchimde khah zhimachih-a lasho,

²nü mün yubo hode nü tholodo; nü mün yubo hode nü phuhdo.

³Jumonü I tsah-a, nü küdah thsüde bekhitang; tümüde nü a nü müyamrü khah ching yüzahdo: yüang tüsho nü küdah thsüde azhihayihang; nü müyamrü ki mushuang.

⁴Nü mükbo yapshede düyüshih, yungsho nü mükküpbo düdüküpshih.

⁵Shihyanrü khah chingnü shihmüchi nangde, tüsho wuhnu-thsürü khah chingnü wuhnu nangde nü küdah thsüde akhiukang.

⁶Müje kilim yüang, nüsa yomuhyothsünrü! Anihbe limrobo lümakheahang tüsho lümlung laang,

⁷küpü wühkenorü, rhimo-kheahrü yungsho yakzanshuhrü müla,

⁸tüshe tsüngkam thsungkheaknü tsühyungbe muzhu ching zomukhungchoh.

⁹Külokhüh nü yapnekudoba, O yomuhyothsünrü? Nü ayapkhi chingnü küyimki asürüba?

¹⁰Ayapkhi anikhüh, yapnekudo anikhüh, sühakhimpü khahbo müchekhi anikhüh —

¹¹junangde nü mükheakmürak ju jangkhijangrarü nangde tüsho nü yihnüpü lakhi ju thsühnuk shuhkhi mihtsürü khülang nangde arübah.

¹²Amüthülünkhi mihtsürü mihbukmuyuk mihtsürünü mülapmüjide tsahchoh;

¹³apinü amükbo athrapchoh, api jing ayitchoh, api yingkhingbo athsochoh;

¹⁴mülapmüji api mulong ching lah, apinü mutuklode amütsü asahchoh, apinü alanaji hiuchoh.

¹⁵Jumonü api thsümütsü nahde arübah; mütsülopü thsüde api nahde athsümünimbah.

¹⁶Harü mungji thuruk ATUNGPUHNÜ thraneanlah, am, thüne apinü thranean lah:

¹⁷kükheangde akheahkhi, akeangyu thakhi mulo, amülim thiyih bukkhi khah,

¹⁸mihbukmuyuk lüm asahkhi mulong, amütsü lim alihkhi ching athrikhi jing,

¹⁹arükchih thiyumütsan asukkhi, tüsho keoniorü bolung alanaji akhiukshihkhi mihtsürü.

²⁰I tsah-a, nü buh yukhümbo zoang, tüsho nü be yakzan dübahyuk.

²¹Jurübo mutukzhakde nü mulong kheak rhükkihang; jurübo nü hung mükamde rümkihang.

²²Küyimki nü ahoribanü, jurünü nü bebah; küyimki nü yapbanü, jurünü nü aheangbah; tüsho küyimki nü asürübanü, jurünü nü ki asukbah.

²³Tümüde thiyukhüm ju tsün, tüsho yakzan ju ayin ah; tüsho adanyukkhi thsülangkhi ju rhangdung limro ah,

²⁴amütsü liberü, münityukpü mulothünak chingnü atsokhishihbah.

²⁵Anihbe jaktsükhi nü mulong chingnü dümürüh, yungsho anihbe mükküpnü nü düphuhshih,

²⁶tümüde nihbe shihyinrünü nü ju yikhap khülang dün kamshihchoh, tüsho müzammüramberünü nü rhangdung yimchoh.

²⁷Mihtsürü khülangnü nihbuh treang kheak mo lude ayüba de, tüsho api khimmih mütakba de?

²⁸Khürünü mokhih atak kheak tsahkhukba de, tüsho ajing mütakba de?

²⁹Jumonü püpürü mihtsürü niuberü lung müyamkhi ju api yung de; anihbe qiurü sheshe müthsümüchidüa mutso.

³⁰Ahührünü api khümde alachoki reangkeampü thsüde ahühkhi mihtsürübonü api amülim müjihchoh.

³¹Tütüshe küyimki api tholobanü anihbuhnü thüne kinü alü jihlobah; apinü kukrukbo alala jihabahbah.

³²Shepü aliberü kheak müzammüram yihbeakchonü anikhitkhi mülachoh; shepünü jude thsüchonü nihbuh thsümünimchoh.

³³Trünthsükhi tüsho mungchih apinü angübah, tüsho api achih ngükhi nana mübah.

³⁴Tümüde mükjomükranü niubuhrü mulong zhipzhipshihchoh, jumonü royimkhi nimung apinü maningshih.

³⁵Apinü ashaklokhi tümü müleangkhi; yungsho nünü buknim ahihdo jihjih she apinü athsunglobah.