Read Yimchungru Naga Müchitmudu 8 Bible Online

Müchitmudu 8 - Yimchungru Naga bible

Müchitmudu 8

¹Lümlungnü müzhi de, tüsho anikhitkhinü anihbe düsheak mushuhkih de?

²Alibenü awung achang kheak, limro yean, limtsahpungbo shoruachihpung zhiplah.

³Alibenü kiuto lim yüzahkhi, chipiripitbo kheak, ayüzahpung kheak zhichoh:

⁴O mihtsürübo, inü nüsa ki jichoh, tüsho I düsheak ju mihtsürü tsührübo kilim lah.

⁵O nüsa lümthülihrübo, lümlung anikhitang, tüsho nüsa makharübo, anikhitkhi mulong thsang.

⁶Aniang, tümüde inü athudakkhibo asukbah, tüsho I münküpbo khimshuhkhi chingnü alungki arübah;

⁷Tümüde I münnü thiyuro asukbah; mihbukmuyukkhi ju I münküpbo ki athraneanbe lah.

⁸I mün yubo alala thiyuro-lungki ching lah; jurü ching akhürang yungsho bephülapkhi tümü müla.

⁹Anikhitrü kilim jurü alala athülih, tüsho mükheahmudu ngürü kilim alungki lah.

¹⁰Shotoyinchi kheaknü a I yo thsangdankhi, tüsho amokhitkhi suna kheaknü a mükheahmudu leangkhiang;

¹¹Tümüde lümlung ju shoto kheaknü atsübe, tüsho khürünü alunekhi alalanü anihbe makekhuk.

¹²I lümlung ah, lümzülümdo bede lah, tüsho mükheahmudu le adüngakhi yimkhitchoh.

¹³ATUNGPUH trekhi ju amütsü thraneanpü ah; lülüshishi le akükheang tüsho amütsü limro le mülapmüji mün inü thraneanlah.

¹⁴Lümthiyan tüsho lümlung atsü I yo; I anikhitkhi, I sühmüh lah.

¹⁵I hode kiulongthsürübonü kiulongthsüchoh, tüsho yakzanshuhrübonü thiyuro yakzan thsüchoh.

¹⁶I hode yakzanshuhrübo, atorübo, alomi mahkhaprübo alalanü yakzan shuhchoh.

¹⁷Sherünü I muzhochonü inü muzhochoh, tüsho sherünü düshihde I yimchonü I ngübah.

¹⁸Lakhitbo tüsho wüntre I lung lah, lakhitbo tüsho kukzam rünkhiungde lah.

¹⁹I sangaso ju atsüdak suna kheaknü atsübe; inü akhiukshihkhi ju amokhitkhi shotoyinchi zhiholah.

²⁰Inü thiyuro tsahpungbo yande thiyuro-lungki limro ching tsahchoh,

²¹junangde inü I muzhorü kilim lakhit yamrüplurüp lushihbah, junangde inü arü rahpungbo mide akamshihbah.

²²ATUNGPUHNÜ api yo akhuhbe rhimo thsüde adüso api rhimobo müngühnü I handarü;

²³I a akheam mülakhi chingnü alomi mülachoki, atankih chingnü alakheah.

²⁴Küyimki asükbo mülakhea, ke suhdahkhi kenübo mülachoki I zübeshih.

²⁵Müzüngbo mülayide, awungbo müngühnü I zübeshih;

²⁶apinü alomi yungsho mükeakbo yungsho alomiküp yo asungthulung tümü müthrünyichokinü alakheah.

²⁷Küyimki apinü thüning thsükheanü I ju ching lakheah, küyimki apinü asük mi kheak akhunung khülang thsükhea,

²⁸küyimki apinü akulim amobo lashihkhea, küyimki apinü asük kenübo lashihkhea,

²⁹küyimki apinü keto kilim aredung thsüjihkhea, junangde kebonü api yukhüm mülakmihpü lakheah, küyimki apinü alomi khimtan thsükhea,

³⁰judüki I a api ki thsüsonungnürü nangde alakheah; tüsho I a kamruhroro api miki asühachihde nimung aban api asühbe lakheah,

³¹api lakhi lomiküp ching asühachihde, tüsho I asühkhi ju mihtsürü tsührübo lung lakheah.

³²Jumonü kheakü, I ki aniang I tsührübo, tümüde sherünü I limrobo zochonü müngühmühi.

³³Thsangdankhi aniang tüsho lümlung laang, tüsho ju dübahyuk.

³⁴Mihtsürü shepünü I ki anicho, I ripitbo kheak nimung aban kheahcho, I khimdopü dungjingbo kheak aleangchonü müngühmühi.

³⁵Tümüde sherünü I ngüchonü rhangdung ngüchoh, tüsho ATUNGPUH kilimnü asühkhi leangkhichoh;

³⁶tüshe shepünü I azhihde neak yihbeakchonü nihbuh küdah thsüde yurichoh; I thraneanrü alalanü ashepü muzhochoh.