Read Yimchungru Naga T H S An Gyu T H S An Gr Arü 10 Bible Online

T H S An Gyu T H S An Gr Arü 10 - Yimchungru Naga bible

T H S An Gyu T H S An Gr Arü 10

¹Ashekhi somünaknü arhümthüneabe arhüm mükede kamshihchoh, junangde aninikhüh makhakhinü lümlung tüsho akinashu lakphüneanchoh.

²Lümlung larü mulongnü tsülim anguhchoh, tüshe makharü mulongnü huzulim anguhchoh.

³Makharünü limro kheak tsahchoki she, arü lümkhi müla, tüsho arü mudukmüke alala ki huhchoh.

⁴Yakzanshuhrünü nü azhihde bukakhiuksho nü rhimo chingnü düdükhe, tümüde zhikde arümkheamkhinü alakmihkhi ato keamloshihpü kuklah.

⁵Yakzanshuhrü kheaknü akhiukkhi nangde alakmihkhi ato ha lomiküp ching amütsü-rhimo inü ngüdo:

⁶makhakhi achang dangpung ahihdo kheak lah, tüsho alarü abobe dangpung kheak binchoh.

⁷Inü khora düthsün kheak azhorü ngüdo, tüsho mükheahmudurü a azhorü nangde jingnü tsahchoh.

⁸Sherünü alokhün kiuchonü ju ching keamyukbah; tüsho sherünü rhü chakashungchonü phurutonü anguhbah.

⁹Sherünü lung kheanchonü junü arü yuribah; tüsho sherü sangthulung cherüpchonü junü arü yuribah.

¹⁰Awü ju duhduh lasho, tüsho müzüsho, sühmüh alü yihnüpü lah tüshe lümlungnü akuk ngüshihchoh.

¹¹Wurük müthsüyide phurutonü nguhsho wurük thsüpü alü müla.

¹²Lümlung larünü athakhi yunü api mungthu hande arüchoh, tüshe makharü münküpnü anihbuh muyuabahchoh.

¹³Api mün ching mudukmüke yunü tankihchoh, tüsho api yu thakhi makhadakkhi ching kheamchoh;

¹⁴makharünü a athakhi lang thachoh. Tümü dünjibanü shenü she mümükheah; tüsho api dunglim tümü dünjibanü api ki shepünü thakhukla?

¹⁵Makharü rhimonü anihbuh khishihchoh, tümütüsho apinü kiuto limro she mümükheah.

¹⁶Nü thsungkheaknü are, O alomi, küyimki nü kiulongthsürü ju athunu laba, tüsho nü limberünü yapsu aniojiba!

¹⁷Nü asühpü, O alomi, küyimki nü kiulongthsürü ju mükheahmudurü thsüba, tüsho nü limberünü kim dükdü ching aniojiba — sühmüh thsungkheaknü tüsho müshangmuru thsungkheak yung!

¹⁸Sühdukkhi hode ayi-lüpkhi keamchoh, tüsho khah sühkeakeakhi hode thüyam ashichoh.

¹⁹Aniojikhibo ju keangrümüne thsungkheak ah; yukhunü rhangdung asühshihchoh, tüsho nü yihnüpü lüpdükhi ngüchoh.

²⁰Nü lüm chingnü lang she kiulongthsürü dathru, yungsho nü yappung khiungshak chingnü she alarü dathru; tümüde wuhnu khülangnü nünü athakhi yusheak hande yünü arü ki thapü kuklah.