Read Yimchungru Naga T H S An Gyu T H S An Gr Arü 4 Bible Online

T H S An Gyu T H S An Gr Arü 4 - Yimchungru Naga bible

T H S An Gyu T H S An Gr Arü 4

¹Kheaküshe alomiküp ching junode rhimokhi inü ngü. Kheahang, junoa lakhi chikebo — shenü arü mushukheam! Arü junorü rheang ki wu lakheah — shenü arü mushukheam.

²Tüsho inü lümdo, kheakü rhangdung larü kheaknü asherü alü kuhi lah;

³tüshe shepü müzübe tüsho alomiküp ching amütsü rhimobo müngünü ane chido kheaknü atsübe ah.

⁴Kheaküshe rhimokhi alala tüsho rhimo ching yeanzamkhi ha mihtsürü khülangnü püpürü ki mükthsükhi hode arüchoh de inü ngüdo. Ha she akeangkeang tüsho apung dunglim müshamchoh.

⁵Bünkeangbünrurünü arü khahbo napchoh tüsho arü nihbuh shih thsümünimchoh.

⁶Khah mahne mide khisahde apung dunglim müshamkhi kheaknü a, keamramkhi ching khah khülang mikhi atsübe.

⁷Kheaküshe, alomiküp ching akeangkeang inü ngü:

⁸bümlangzü zhikrangkhündo, tsührübo tüsho keoniorübo mülade khürü lah; tütüshe api rhimo alala ching arün müla, tüsho api lakhit kheak api mük mümi. Apinü küyimkishe mükeokhi, “ I ha she thsungkheak rhimocho, tüsho I a asüh-a mulu le?” Ha she akeangkeang tüsho masühbe rhimo lah.

⁹Khülang kheaknü mahne atsübe ah, tümütüsho ane rhimokhi thsungkheak ane thsambah lah.

¹⁰Tümüde khülang lungsho, khülangnü püpürü ju bemusubah; tüshe shepü azangrü labah alungba tüsho arungpü thsüde püpürü mülanü ayokhe.

¹¹Kheaküshe, mahne rukhüh yapsho, ane lamlamchoh; tüshe küde thsah khülang langzünü alamlamkhukpü?

¹²Tüsho khülangnü püpürü azhihde wususu she, mahnenü khülang kukbah. Liu mahsam chitrukhi nahde müzhakchoh.

¹³Kiulongthsürü ashinbuhrü thsübah athsunganah mulurü makharü kheaknü a zhochihrü tüshe lümlung larü athunu atsüdakbe ah.

¹⁴Lomi ching zhochihde zübebe she, khürünü kiulongthsüpü rihyam chingnü akhiukpü kuklah.

¹⁵Alomiküp ching tsahrü, rhangdung larü alala kiulongthsürü müthribuh athunu yankhi inü ngü;

¹⁶apinü abekhi mihtsürü akheamarün müla; tütüshe sherübo ashulim arüchonü api kheak masüh. Tsükjide ha she akeangkeang tüsho apung dunglim müshamchoh.