Read Yimchungru Naga T H S An Gyu T H S An Gr Arü 7 Bible Online

T H S An Gyu T H S An Gr Arü 7 - Yimchungru Naga bible

T H S An Gyu T H S An Gr Arü 7

¹Mung atsü ju rhümthünea kheaknü atsübe, tüsho zübe nimung kheaknü ashe nimung atsübe.

²Aniojikhi yam ching yükhi kheaknü mitrip yam ching yükhi atsübe; tümüde ha mihbüm aban thsungkheak akheam lah, tüsho arhang larünü ju mulong ching zobah.

³Mulong tukthsükhi ju keangrümünekhi kheaknü atsübe, junü nü miro masühshihpü kuklah, tüshe nü anikhitkhi züpzüpshihchoh.

⁴Lümlung larü mulong ju mitrip yam ching lah; tüshe makharü mulong a shih asühkhi yam ching lah.

⁵Makharü khün anipü kheaknü a lümlung larünü athürühkhi anipü atsübe.

⁶Tümüde mo ching ayang threakthreakkhi nangde, makharü keangrümünekhi ju ruk ah; ha she akeangkeang.

⁷Tsükjide ajunokhinü lümlung larü makhashihchoh, tüsho buknimnü mulong thsümünimchoh.

⁸Tümükhüh atankihkhi kheaknü a akheamkhi atsübe; kükheangküyang kheaknü a arümkheam atsübe.

⁹Bukakhiukpü düniokheam, tümüde bukakhiukkhi ju makharü khüh kheak lah.

¹⁰Dütha, “Tümüde harü kheaknü ahobe nimungbo atsübe lakhea?” Tümüde nünü ha keokhi ju lümlung chingnü yung.

¹¹Lümlung ju yamrüplurüp kheaknü atsübe, sherünü ani ngüchonü alü lah.

¹²Sho ha kurampung lakhi nangde lümlung ha kurampung ah, tüshe mükheahmudu alü thsükhi ju lümlung larü junü rhangdung jihchoh.

¹³Thrünpuh rhimo lümakheahang; apinü khürangshihkhi shepünü mukhiungshihpü kukla?

¹⁴Tsüde alakhi nimung asühang, tüsho küpkhuk arükhi nimung lümakheahang; Thrünpuhnü khülang she tüsho püpü she thründo, junangde mihtsürübonü arü dunglim tümü arübanü müyimkhit.

¹⁵I rhangdung akeangkeang ching inü lüpdükhi ngüdo; thiyuro mihtsürü api thiyuro-lungki ching dükheakchoh, tüsho mihbukmuyuk mihtsürü api amütsü rhimokhi ching rhangdung ashang lah.

¹⁶Hodakde thiyuro-lungki düthsü, yungsho hodakde lümlung düla; tümüde nünü nü langzü thsümünimpü?

¹⁷Hodakde mihbukmuyuk dükam, yungsho makhade dükam; tümüde nü kim mukhiungyide nü ashepü?

¹⁸Nünü khülang she müdükhede püpü ramlopü ju atsü lah; tümüde shepünü Thrünpuh trebanü ane chido akuk ngübah.

¹⁹Lümlungnü lümlung larü kilim kiuto yakzanshuhrü 10 kheaknü alü sühmüh jihchoh.

²⁰Tsükjide shahde neak müyihbeakde atsü rhimopü alomi kheak khide thiyuro larü müla.

²¹Mihtsürünü athakhi lüpdükhi dani, jude yungsho nü yamlarünü nü athrukhi nünü asobah;

²²nünü ahihdo ki mührü athrukhi nü mulongnü mükheahlah.

²³Ha alala lümlung hode inü rükakiakheahdo; inü tha, “ I lümlung labah,” tüshe ju I kheaknü limshude alakheah.

²⁴Küpü limshude la, tüsho sükla, khide süklah; shenü ju yimkhitkhukpü?

²⁵Inü lümlung yimkhitpü tüsho lümakheahpü, tüsho mihbukmuyuk makhakhi ju bünkeangbünru ah de mükheahpü lümkhi rholo.

²⁶Ashekhi kheaknü akhüh liberü ju azheang lakhi inü yimkhit, shepü mulong qimürip tüsho keangbo la, shepü khahbo wuhrünliubo la; shepünü Thrünpuh asühshihchonü anihbe kheaknü atsokhibah, tüshe aneakrü a anihbenü tholochoh.

²⁷Kheahang, inü ayimkhitkhi ha lah, Thsangyuthsangrarünü ha tha, tümükhüh yimkhitpü tümüanü khülang ju püpü ching yukajak,

²⁸küpü I lümlungnü alochode ayimkhea, tüshe inü müyimkhit. Chithürü bolung athrürü khülang inü yimkhit, ha alala bolung aliberü inü müyimkhit.

²⁹Kheahang, ha lang inü yimkhitdo, junangde Thrünpuhnü mihtsürübo lungkide thrün, tüshe arünü lümkhi ahihkhüh thsümüchih.