Read Yimchungru Naga Khünbolungkhün 2 Bible Online

Khünbolungkhün 2 - Yimchungru Naga bible

Khünbolungkhün 2

¹I a Sharon sangbün khülang ah, jindükhünbo thrilung sangbün khülang ah.

²Ayang bolung thrilung sangbün khülang nangde, I tsübe anünürü bolung lah.

³Mukhiukdung khülang sangdung bolung nangde, athrününgtsüng bolung I tsübuh lah. Khide asühde inü api alamme khüp bindo, tüsho api sangaso kede tsüh.

⁴Apinü I aniojikhi yam ching bede arü, tüsho I kurungkheak api riphin ju amuzho lakheah.

⁵Kurungaso mukuhnü I mütrüang, mukhiukbonü I düküngshang; tümüde I muzhoachih tukthsü lah.

⁶Api khah huzulim I ku khüp lakheah tüsho api khah tsülimnü I kapkheah!

⁷Inü thachoh, O Jirusalem tsührü liberübo, athri shihmüchi yungsho rimsung tamde thiyuchihchimang: Khide mükünchokia ike muzho dürhumusu!

⁸I tsübuh düsheak sochoh! Kheahang, api awungbo kheak jukde, awung mujukbo alihhode arüchoh.

⁹I tsübuh a rimsung nangde lah yungsho tuzhuk nunu nangde lah. Kheahang, api isa rhü dunglim zhiplah, ayinripit ching kheahde, phomulokhi chingnü abina kheahchoh.

¹⁰I tsübuhnü I ki asukchoh tüsho thachoh. “Asürang, inü amuzhobe, I tsübe, tüsho arüabahang;

¹¹tümüde kheaküa tsüngkam hoabahdo, tsüng hoabahdo tüsho tsoabahdo.

¹²Sangbünbo alomi kheak akhiukchoh; khün thsüpü kim arüdo, tüsho müthrithrümpü düsheak isa lomi ching sochoh.

¹³Khubaso dungnü aso asochoh, tüsho kurungasobo pungchoh; arünü arhümthünea jihchoh. Asürang, inü muzhobe, I tsübe, tüsho arüabahang.

¹⁴O I müthrithrümpü, lungto dükeak ching, ajikpung awung-düpheak ching, inü nü miro kheahanü, inü nü düsheak soanü; tümüde nü düsheak niunglah, tüsho nü miro tsülah.

¹⁵Rimrebo ramang, rimre nunubo, küpünü kurungasolu thsümünimcho — tümüde isa kurungasolubo pungkhitde lah.”

¹⁶I tsübuh ju I yo tüsho I api yo; apinü api mihnu boto thrilung sangbün bolung yimkipchoh,

¹⁷yapsu apung yünkhi tüsho amiting tsokhi khiungde, I tsübuh, awung-düpheak kheak rimsung yungsho tuzhuk nangde rholoang.