Read Yimchungru Naga Khünbolungkhün 3 Bible Online

Khünbolungkhün 3 - Yimchungru Naga bible

Khünbolungkhün 3

¹Azhing ching I yapkiu kheak shepü I menü muzhochonü inü api yimdo; inü api yimdo, tüshe api müngü.

²Inü kheakü wusubah tüsho kiuto kiudunglimro tüsho wungdophulung ching yübah; shepü I menü muzhochonü inü api yimbah. Inü api yimdo, tüshe api müngü.

³Kiuto aheangde atsahrünü I ngü. Inü arü ki keokhi, “Nüsanü I tsübuh ngünah?”

⁴Anükhüh labah inü arü hodunglim, I menü amuzhobuh inü ngü, inü api ramlo, tüsho I zübekhi I be yam khiungshak ching bede marüyi khiungde inü api mutsoshih.

⁵Inü nüsa ki thachoh, O Jirusalem tsührü liberübo, athri shihmüchi tüsho rimsung tamde thiyuchihchimang: khide mükünchokia ike muzho dürhumünean!

⁶Sunglo chingnü mokhüh chitthulung, arhümthüneabe tüsho jinjinlak münimde, yinzüyindorü yo rhümthüneabe kukruk alala lubah athsükhibo nangde yükihcho ha she a?

⁷Kheahang, ha Solomon shuhpung-yapkiu ah! Ju mükamde Israel mihtsürü amüzhakbo 60 lah.

⁸Arü alala nukshang nolah tüsho thirithsü ching athsüso, mihbüm abannü azhing ching trekhinü nukshang nozhilah.

⁹Kiulongthsüpuh Solomonnü anihbuh thsungkheak ahanpung khülang thsü, apinü Lebanon sangnü thsü.

¹⁰Apinü dungjingbo shotoyinchinü thsü, aduhlobe sunanü thsü, binkiu-lütlüt ju mürümmuchu ah; alunglim ju Jirusalem tsührü liberübonü düshihde akeakkhinü khim.

¹¹Akhiukang, O Zion tsührü liberübo, abenü api thranjihkhi kuthran kheak api yamkhün thsükhi nimung, api mulong asühkhi nimung kiulongthsüpuh Solomon kheak kheahang.