Read Yimchungru Naga Khünbolungkhün 6 Bible Online

Khünbolungkhün 6 - Yimchungru Naga bible

Khünbolungkhün 6

¹Nü tsübuh külim yüde, O aliberü bolung atsüdakbe? Isanü nü lung api yimpü thsüde nü tsübuh küpü limro ching tsode?

²I tsübuh api wündo ching, rhümthüneabe ching, api mihnu boto yimkippü, tüsho thrilung sangbünbo zükmukhungpü yükido.

³I a I tsübuh yo tüsho I tsübuh ju I yo ah; api a thrilung sangbün bolung api mihnu boto yimkipchoh.

⁴I tsübe, nü a Jirusalem nangde, Tirza kiuto nangde jak tsülah, bonungrünü riphin shuhkhi nangde atrebe lah.

⁵I kheaknü nü mükjibo anguhde tsoang, tümüde arünü I tahdochoh! Nü kuyü ju mihnu boto Gilead wungdüpheak kheak yükikhi ruk ah.

⁶Nü hü ju namfimihnu drebo, kemüyihbah akhiukkhi nangde; arü drepung abanlah, tüsho arü bolung sheshe langzü müla.

⁷Nü ngobo ju amuhiukhi khüp tsarümkiu phukrüpkhüh nangde lah.

⁸Kiulongthsüberü 60, hanniuberü 80 tüsho anünürü mükhekhi lah.

⁹I yo müthrithrümpü, khiukdahkhi ju khülang lang lah, abenü amuzhodakkhi, anihbe zübebe kheaknü müchamachih. Anünürübonü alibe ngüchoh tüsho müngühmühi de jichoh; kiulongthsüberü tüsho hanniuberübonü alibe shijihchoh.

¹⁰“Yapsu kheah-a yüshihkhi, khinu atsü, ani nangde ayinkhi, bonungrünü riphin shuhbah alakhi atrebe nangde la ha shepü a?”

¹¹Inü almond sangaso yi ching, jindükhün ching pungkhibo kheahpü, kurungasobo duduhkhi tüsho tsarümkiu pungkhi kheahpü yükido.

¹²I mülümrhangyide, lolungbe-berü thirithsüpü lakhi nangde nünü I muzhoachihpü künde kamshih.

¹³Rholoang, rholoang, O Shulamberü! Rholoang, rholoang, junangde isanü nü kheak kheahbah. Tümüde nüsanü Shulambe kheak, mihkheahrü mahne dükeak tsünkhi nangde akheahba le?