Read Yimchungru Naga Isa 13 Bible Online

Isa 13 - Yimchungru Naga bible

Isa 13

¹Amoz tsührü Isaianü Babilon dünkheak ngükhi müchityu.

²Awung achang kheak riphin khülang shuhkihang, arü ki achangnü zhiang; mükheahmudurü ripit ching yüzahpü arü thsungkheak nü khah ayitang.

³Inü müsühkhitrübo inü thiyukhüm jih, I rithsürübo, I lung asühachihrübo I bukakhiukkhi rhimoshihpü jimukhungdo.

⁴Aniang, awungbo kheak alankhi boto ato khülang nangde! Aniang, kiulongthsübo arhunganimkhi, trükshihbo rukhüh shomukhungkhi! Wuto ATUNGPUHNÜ keochihpü thsungkheak bonungrü kitmukhungchoh.

⁵Arübo limshu lomi chingnü arüchoh, thüningbo akheam chingnü, A TU N GPU H bukakhiukkhi thsühnukbonü lomi athrünkhi thsümünimpü lah.

⁶Tüzhode tripang, tümüde ATUNGPUH nimung thüninde lah; ju Wuto kilimnü athsümünimpü nangde arübah!

⁷Jumonü khah alala keahkhibah tüsho mihtsürü aban mulong niubah,

⁸tüsho arübo trede akambah, thsünü tüsho thsümütsünü arü tholobah; arübo aliberü khülang zübepü thsünü ching lakhi nangde thsünükhi ching labah. Arünü khülangnü khülang kheak trede akheahbah; arü mirobo motru nangde alabah.

⁹Kheahang, A TU N GPU H nimung, bukmükede tüsho müshakde bukakhiukde, alomi zhikabahshihpü, tüsho ju chingnü aneakrübo dükheakshihpü arüchoh.

¹⁰Tümüde thüning ching chiningbo tüsho chirhangshuhrübonü arü ayin müjih; ani akhiukkhi mitingdo akambah tüsho khinunü nihbuh ayin müjih.

¹¹Amütsü-rhimo dünkheak inü alomiküp thsümüchibah, tüsho amülim dünkheak mihbukmuyuk thsümüchibah; inü kükheangküyangrü bukakhiukkhi akheam thsüshihbah, tüsho mihmukhiuh kükheangkhi keamkhishihbah.

¹²Inü mihtsürübo ju atsüdak suna kheaknü alü nükde akamshihbah, tüsho Ophir suna kheaknü nükde akamshihbah.

¹³Jumonü Wuto ATUNGPUH müshakde abukakhiukkhi nimung ching inü thüningbo ajanshihbah, tüsho alomi ju ayappung kheaknü aniukshihbah.

¹⁴Shihyankhi shihmüchi nangde, yungsho akümrü mülakhi namfimihnu nangde, alala arü nihbuh mihtsürübo kilim rholobah, tüsho alala arü nihbuh lomi lim tsobah.

¹⁵Shepü angükhitbanü chinkhitde adüchipbah tüsho shepü tholobanü nukshangnü akeamshihbah.

¹⁶Arü tsührü aninibo arü mük kinü adütre kamde yihthünakbah; arü khorabo yankhia lubah, tüsho arü niuberübo thsümünimbah.

¹⁷Kheahang, inü arü azhihde, shotoyinchi mulunerü tüsho suna kheak masührü Midiarü rhumusuchoh.

¹⁸Arü sanglühbonü athunu mihtsürübo laksahbah; arünü nuyam sangaso kheak mihmüthsüm mülade alabah; arü müknü azürübo kheak kheah-a mümuzho.

¹⁹Tüsho kiulongthsübo müretahkhi Babilon, Kaldea atsüdak tüsho mungthu ju Thrünpuhnü Sodom tüsho Gomorra dükheakshihchoki nangde akambah.

²⁰Ju ching küyimkishe müla yungsho lün alala ching müla; Arabrünü ju ching arü khimyam müthsü, mihnu neakrünü ju ching arü mihnubo müyapshih.

²¹Tüshe mütüm shiwühbonü ju ching yapbah, tüsho thüyambo ju khunganimkhi shiwühbonü amibah; ju ching kewühtopübo labah, tüsho ju ching mütüm mihnubo tsünbah.

²²Rimrebonü aheangsadambo kheak khungbah, tüsho shirungbo kiulongthsürü yam atsüdakbo ching labah; ha kim khah ki phünide lah, tüsho ha nimung makhin.