Read Yimchungru Naga Isa 14 Bible Online

Isa 14 - Yimchungru Naga bible

Isa 14

¹Tüshe ATUNGPUHNÜ Jakob kheak mihmüthsüm labah tüsho kheaküshe Israel mokhitbah, tüsho arü lomi ching lashihbah; khiungkerünü arü lung arihbah tüsho arünü Jakob yamkhün lung labah.

²Tüsho trükshihbonü arübo arü lapung ching bedarübah, tüsho arübo ATUNGPUH khah ching Israel yo athrürü tüsho aliberü azhorü thsübah; arünü arü ramrü rama lubah, tüsho arü junorü kurungkheak yakzan shuhbah.

³Küyimki nüsa thsünü le thsümüchi tüsho nüsa rhimo amüküp tankihpü chingnü ATUNGPUHNÜ nüsa sühakhimshihbanü,

⁴nüsanü Babilon kiulongthsüpuh azhihde ha mükhemükimbah: “ Küdükhüh she ajunorü arün thsüde! Küdükhüh she api mulong zhipzhip arün thsüde!

⁵ATUNGPUHNÜ mihbukmuyuk shitso, yakzanshuhrü tso yihshakdo,

⁶küpünü bukakhiukkhi ching mutuklode mihtsürübo shika lungshihkhea, küpünü bukakhiukkhi ching trükshihbo yakzan shuhde mihmuzho mülakhi thsümüchikhea.

⁷Alomi abümnü sühakhim tüsho keamramkhi ching lah; arünü khün thsüde zhichoh.

⁸Saipress sangbonü nü kurungkheak asühchoh, Lebanon cedarbonü thachoh, ‘ Tümütüsho nü abukkhüp yapmonü, isa kiushakpü she marü.’

⁹“ Nü arüchoki shorupü abukkhüp lakhi Ashe-lomi rhumusua lah; nü shorupü mebo asürüchoh, sherübo alala alomi limberübo lakhea; trükshih kiulongthsürü mebo alala arü kiulongthsü-binkiu kheaknü asürüchoh.

¹⁰Arü alalanü asukbah tüsho nü ki thabah: ‘ Nü she isa nangde sühmüh mülade kamdo! Nü isa nangde kamdo!

¹¹Nü yo akinashu tüsho nü bingshang düsheakbo Ashe-lomi ching hande yüzahdo; musobo ju abukkhüp nü yapkiu ah, tüsho aribo ju nü muhiudobe ah.’

¹²“ Nü küruk yinmi chingnü ayokhikhea, O Animung Chining, Yapsu tsührü! Nü küruk alo kheak kiushaka keamshihkhea, nü shepünü trükshihbo keamkhishihkhea!

¹³Nünü nü mulong ching tha, Inü yinmi ching yükihbah; inü I kiulongthsü-binkiu ju Thrünpuh chiningbo kumung shuhkihbah; inü mukhungmüdan wung Zaphon mujuk kheak binbah;

¹⁴inü amo kumung kheak yükihbah, inü I küdah thsüde Khide Achang kamshihbah.

¹⁵Tüshe nü Ashe-lomi ching, Alokhün ching hande yüzahdo.

¹⁶“Sherünü nü ngübanü nü kheak müzhingkihbah, tüsho nü lümakheahbah: Alomi ajanshihbuh ha mihtsürü a de, shepünü kiulongthsübo niukshihkhea,

¹⁷shepünü alomiküp loshelo nangde kamshih tüsho kiutobo yanabahkhea, shepünü nihbuh aramrübo thüyam lim müyüshihkhea?

¹⁸Trükshih kiulongthsürü alala müretahkhi ching, mihbüm abande nihbuh kiuyuk ching yaplah;

¹⁹tüshe nü a nü kiuyuk chingnü jipkhita bahlah, abahyukkhi sangkhah nangde, ashenü muhiudobahle, küpü nukshangnü düchipashungkhea, shepü Lungkhün ching yüzahkhea, ashemi khülang müphü khüp jungkhi nangde.

²⁰Nü mi bahpü arü lung mübe, tümütüsho nünü nü lomi thsümünimdo, nünü nü mihtsürübo laksahdo. Amütsü-rhimorü tsühsoniusobo küyimkishe mung düjishih!

²¹Api tsührübo arü bebuhrü amülim dünkheaknü alaksahpü tsanglungang. Alomi müküh-a lupü arü dasürüshih yungsho kiutobonü alomiküp dümishih.”

²²Inü arü azhihde wusubah, Wuto ATUNGPUHNÜ thachoh, tüsho Babilon chingnü mung tüsho aninga larü, tsührü tüsho tsühsoniusobo kheamshihbah.

²³Tüsho inü ju lungru lapung tüsho kepheanglo kamshihbah, tüsho inü athsümünimbe phütdungnü aphütbah, Wuto ATUNGPUHNÜ thachoh.

²⁴Wuto ATUNGPUHNÜ thiyuchihchimdo: Inü alümkhi nangde, junangde alabah; tüsho inü alümkihkhi nangde, ju adünjibah:

²⁵Inü Asiriarü I lomi chingnü dükheakshihbah, tüsho I yo awung kheak müphü khüp api jungbah; api sangkaplak, tüsho api hahmülang arü dubuh kheaknü lahkhia bahbah.

²⁶Ha lomi athrünkhi dünkheak inü lümkhi thsülah; tüsho ha trükshih alala kurungkheak chungkihkhi khah lah.

²⁷Tümüde Wuto ATUNGPUHNÜ lümkhi thsüdo, tüsho shenü ju zhipdokhukpü? Api khah chungkih-a lah, tüsho shenü ju tukloshihba?

²⁸Kiulongthsüpuh Ahaz shekhi kam ching ha müchityu arü:

²⁹Nüsa shikkhi tso zhakmonü dasühachih, nüsa Filistiarü alala, tümüde phuruto ying chingnü lokung phuruto akhiukbah, tüsho ju asokhinü aphinkhi amüzhak phuruto labah.

³⁰Zhochihrü bolung zhochih traktrakrü yimtsühpü ngübah, tüsho küpkhukrü atsokhitkhi ching yapbah; tüshe inü nü ying akhümnü asheshihbah, tüsho nü kheaknü aningkhi inü alaksahbah.

³¹Tüzhode tripang, O chipiripit; zhiang, O kiuto, atrekhinü niuang, O Filistia, nüsa alala! Tümüde dukulimnü mokhüh akichoh, tüsho ju mulong zahkhi yakkihrü bonungrü ah.

³²Trükshih yunithsürü ki shenü tümü aloba? ATUNGPUHNÜ Zion thsükhitdo, tüsho api mihtsürü bolung küpkhukrü ju ching tsoyukbah.