Read Yimchungru Naga Isa 2 Bible Online

Isa 2 - Yimchungru Naga bible

Isa 2

¹Ha Amoz tsührü Isaianü Juda tüsho Jirusalem dünkheak ngükhi yu ah.

²Arübe nimung ching ATUNGPUH yam wung ju awungbo lung achangbe thsüa labah tüsho awungbo kumung shuhkihbah; trükshih alalanü ju kheak shobah,

³mihtsürü ahihdo arübah tüsho athabah. “Arang, isanü ATUNGPUH wung lim, Jakob Thrünpuh yam ching wutuanü; junangde apinü api limrobo isa ki thsangyubah tüsho isanü api jingshubo ching tsahbah.” Tümüde Zion chingnü yakzan, tüsho Jirusalem chingnü ATUNGPUH yu wukhiukbah.

⁴Apinü trükshihbo dükeak mahkhapbah, tüsho mihtsürü ahihdo thsungkheak khikzhakjihbah; arünü arü nukshangbonü thuwuh kingbah, tüsho arü thsühbonü arhebe nukjipbo kingbah; trükshihnü trükshih azhihde nukshang mushuhkih, yungsho arünü kheaküa thirithsüpü mümükheahde akambah.

⁵O Jakob yamkhün, arang, isanü ATUNGPUH ayin ching tsahanü!

⁶Tümüde nüsanü nüsa mihtsürü bahyukdo, O Jakob yamkhün. Dükde arübo aniakhiuklim wurükbonü milah tüsho Filistiarü nangde müchityu tharübo lah, tüsho arünü khiungkerü lung khah zhimachih.

⁷Arü lomi shotoyinchi tüsho sunanü milah, tüsho arü rahpungbo akheamarün müla; arü lomi khorabonü milah, tüsho arü khora-lolungbebo akheamarün müla.

⁸Arü lomi sangthsünü mide lah; arünü arü khahnü athsükhi, arü yingkhingbonü athsükhi ki khukningchoh.

⁹Mihtsürübonü khukningchoh, tüsho mihtsürü abannü azhihayihde kamchoh; jumonü arü neak dübahjih!

¹⁰ATUNGPUH atrebe tüsho api wüntre-müretah chingnü tsokhide lungkhün ching yüzahang tüsho alokhün ching jikang.

¹¹Mük müzhingrü mihtsürü thokheambah, tüsho kükheangküyangrü aban aninibe kamshihbah; tüsho ju nimung ching ATUNGPUH lang ashuhkihbah.

¹²Tümüde kükheangküyangrü tüsho changde-alümrü, ashuhkihkhi tüsho achangkhi alala azhihde Wuto ATUNGPUH nimung khülang lah;

¹³Lebanon cedarbo alala, changdealümrü tüsho shuhkih-a lakhi azhihde; tüsho Bashan thülamsang alala azhihde;

¹⁴müzüngbo achang alala azhihde, tüsho awung mujukbo alala azhihde;

¹⁵aheangsadam aban azhihde, tüsho chipi ayünkhi aban azhihde;

¹⁶Tarshish sangkung alala azhihde, tüsho akhamkhi khahrhimo alala azhihde.

¹⁷Changdealümrü mihtsürü aninibe kamshihbah, tüsho mihbüm aban kükheangkhi thokheambah; tüsho ju nimung ATUNGPUH lang ashuhkihbah.

¹⁸Sangthsübo abümnü mülade akambah.

¹⁹Apinü alomi müzünpü asürüchoh, ATUNGPUH atrebe tüsho api wüntre-müretah chingnü tsokhide lungkhünbo tüsho alokhün ching yüzahbah.

²⁰Ju nimung mihtsürübonü arü shotoyinchi le suna sangthsübo ju udungbo le phihnubo kilim jipa bahbah, küpü arünü kingaünpü thsungkheak thsükhea,

²¹ATUNGPUH atrebe tüsho api wüntre-müretah chingnü tsokhide lungkhün atobo tüsho lunghü dükeak ching yüzahpü thsüde, alomi müzünpü api asürüchoki labah.

²²Nupung ching sheak lang alakhi mihtsürü kheaknü rholoang, tümüde arü kheyukkhi tümü la?